جەرىڭ بولسا جاقسى...

الماتى وبلىسى بويىنشا پايدالانىلماي جاتقان 2 ميلليون گەكتارعا جۋىق جەر انىقتالعان.

«اتاجۇرتتان جەر بۇيىرمادى». الماتى وبلىسىنىڭ تەسكەنسۋ اۋىلىنداعى مال باققان شارۋالار جايىلىمعا جارىماي وتىر. ال حالىق قولدانىسىنا بەرىلگەن جازىققا جۇرتتىڭ ءتورت تۇلىگى سىيمايتىن كورىنەدى، دەپ حابارلايدى اlmaty-akshamy.kz   Almaty.tv-گە سىلتەمە جاساپ.

تەسكەنسۋ اۋىلىنداعى حالىقتىڭ دەنى اۋىل شارۋاشىلىعىمەن اينالىسادى. كۇنكورىس كۇنىنە اينالعان شارۋانى دامىتىپ، مال باسىن كوبەيتكىسى كەلگەنمەن، جەر جەتپەيدى. سەبەبى اۋىل توڭىرەگىندەگى جازىقتىڭ كوپ بولىگىن كەزىندە كاسىپكەرلەر الىپ العان كورىنەدى.

«8،5 مىڭ تۇرعىنى بار اۋىلدا 6 مىڭ باس قوي، 2700 باستاي ءىرى ءمۇيىزدى قارا، 1500 باستاي جىلقى تىركەلگەن. جەر جوق، قايدا جايامىز؟ اركىمگە جالىنامىز. جەردى الىپ العان لاتيفۋنديستەرگە ءتورت تۇلىكتى جايۋ ءۇشىن قوي، جىلقى بەرىپ، كۇن كورىپ ءجۇرمىز»، – دەدى تەسكەنسۋ اۋىلىنىڭ تۇرعىنى اسقار سەيسەنقۇلوۆ.

ءتىپتى حالىقتى قورقىتىپ وتىرعاندار دا تابىلادى ەكەن.

ەگىن ورىپ بولعاننان كەيىن وسى جەرگە جايىپ جاتىرمىز. 5-10 كۇننەن كەيىن بۇل جەرگە دە وتە المايمىز. حالىقتىڭ مالىن قايدا اپارامىن؟ بىلتىر ماعان: «بۇل جەرگە وتۋگە بولمايدى. جەكەمەنشىك جەر. بۇل كىسىلەردىڭ بەرەتىن ءوز ادامى بار. ءتيىستى ادامعا حابارلاسامىن. كوزىڭدى قۇرتىپ جىبەرەدى» دەگەن كەزدەر دە بولدى.  قورقىپ تا قالدىم»، – دەدى مالشى اباي قاسقاروۆ.

جەرگىلىكتى اكىمدىك وكىلىنىڭ ايتۋىنشا، اۋىل ماڭىنداعى 1000 گەكتاردان اسا اۋماقتى 2000 جىلدىڭ باسىندا 3 كومپانيا اۋداننىڭ جەر قورىنان 49 جىلعا جالعا العان. 2 كاسىپكەر جازىققا جۇگەرى ەگىپ، ەگىستىك ماقساتىندا ءالى دە پايدالانىپ جۇرگەن كورىنەدى.

«اگرويۋنيون» ج ش س 250 گا جەر تەلىمىن العان. ونىڭ نىسانالى ماقساتى – جايىلىم. قازىرگى تاڭدا وبلىستىق جەر باسقارماسىنا جىبەرىلدى. جەر ينسپەكسياسى «جەردى قايتارۋ» بويىنشا سوتقا بەرۋ جۇمىسىن جۇرگىزىپ جاتىر»، – دەدى تەسكەنسۋ اۋىلدىق وكرۋگى اكىمىنىڭ ورىنباسارى ەلامان ەلۋباي.

ال پروكۋراتۋرا دەرەگىنشە، وبلىس بويىنشا پايدالانىلماي جاتقان 2 ميلليون گەكتارعا جۋىق جەر انىقتالعان. بۇگىندە سونىڭ 114 مىڭى قايتارىلىپتى. 1،5 مىڭ گەكتارداي جەر تەلىمى تەسكەنسۋ اۋىلدىق وكرۋگىنىڭ قوعامدىق جايىلىمى رەتىندە راسىمدەلگەن. الايدا ەلدىمەكەننىڭ وزىندەگى جۇرت بەرىلگەن جازىق اۋىلدان الىس جاتقانىن ايتادى.