37 قىلمىستىق ءىس قوزعالعان.
بەيبىت شەرۋگە قاتىسۋشىلاردى ازاپتاعان پوليسەيلەردىڭ ىسىمەن ANTIKOR اينالىسىپ جاتىر، دەپ حابارلايدى Almaty-akshamy.kz Turkystan.kz سىلتەمە جاساپ.
قاڭتار وقيعاسى كەزىندەگى بۇلىكشىلەردى انىقتاپ، جازالاۋ ماقساتىندا جۇرگىزىلىپ جاتقان قۇقىقتىق شارالار بارىسىندا اسىرا سىلتەۋگە جول بەرىلگەنى بەلگىلى. ۇستالعانداردى ازاپتاۋعا قاتىستى قوزعالعان قىلمىستىق ءىستى سىبايلاس جەمقورلىققا قارسى قىزمەتى الماتى وبلىستىق دەپارتامەنتى جۇرگىزىپ جاتقانى بەلگىلى بولدى. ۆەدومستۆو باستىعىنىڭ ورىنباسارى دۋلات مادياروۆتىڭ ايتۋىنشا، بۇگىندە ءدال وسى باپ بويىنشا 37 قىلمىستىق ءىس قوزعالعان.
«كەلىپ تۇسكەن جابىرلەنۋشىلەردىڭ وتىنىشتەرىندە قۇقىق قورعاۋ ورگاندارىنىڭ قىزمەتكەرلەرى تاراپىنان ازاپتاۋعا ۇشىراعانى جايىندا ايتىلعان. ياعني، ولاردىڭ بارلىعىندا قاڭتار وقيعاسىنا قاتىستى قىلمىستىق ىستەردى تەرگەۋ كەزىندە ازاپتاۋلار جاسالعانى باياندالعان. پوليسيا جانە باسقا دا قۇقىق قورعاۋ ورگاندارى قىزمەتكەرلەرىنىڭ بۇل ارەكەتتەرىنە جابىرلەۋشىلەردىڭ قورعاۋشىلارى، تۋىستارى، اتا-انالارى ءوتىنىش ءبىلدىردى. سونىمەن قاتار، كۇن سايىن جۇرگىزىلەتىن قاجەتتى تەرگەۋ ارەكەتتەرىنە ب ا ق مونيتورينگى جاسالۋدا. قازىرگى ۋاقىتتا تەرگەۋدىڭ جان-جاقتىلىعىن قامتاماسىز ەتۋ ءۇشىن ءبىرقاتار تەرگەۋ امالدارى جۇرگىزىلۋدە»، – دەدى دۋلات مادياروۆ.
جالپى، الماتى وبلىسىندا قاڭتار وقيعاسى بويىنشا بارلىعى 409 قىلمىستىق ءىس تەرگەلۋدە، ونىڭ ىشىندە 158 ءىس ۇرلىققا، 191 ءىس قارۋدى زاڭسىز ساقتاۋعا 11 ءىس تەرروريزمگە، 3 ءىس جاپپاي تارتىپسىزدىك جانە 3 ءىس كىسى ءولتىرۋ بابىنا قاتىستى قوزعالعان.
بۇگىنگە دەيىن وسى ۇستالعانداردىڭ ارەكەتىنە قۇقىقتىق باعا بەرىلىپ، 60-تان استام تۇلعاعا قاتىستى ءىس جەڭىلدەتىلگەن. ولاردىڭ دەنىنە قوعامنان وقشاۋلاۋ بابىنان تىس ءتۇرلى بۇلتارتپاۋ شارالارى قولدانىلىپ وتىر ەكەن. تەرگەۋ ناتيجەلەرى بويىنشا جازانى جەڭىلدەتۋ ماقساتىندا 93 اپەللياسيالىق ءوتىنىشحات ەنگىزىلىپ، سوت تاراپى پروكۋروردىڭ اكتىلەرىن قاناعاتتاندىرىپتى. ناتيجەسىندە 71 ادام قاماۋدان بوساتىلىپ، 22 ادامعا سالىنعان ايىپپۇل ەسكەرتۋگە اۋىستىرىلدى. پروكۋراتۋرانىڭ دەرەگىنە سەنسەك، ءقازىر وبلىس اۋماعىندا اكىمشىلىك ءىس بويىنشا قاماۋدا وتىرعان ادامدار جوق ەكەن.