ۇلتتىق بيوتەحنولوگيا ورتالىعىنىڭ عالىمى ۆياچەسلاۆ وگاي باعانالى جاسۋشالاردى قولدانۋ ارقىلى كۇردەلى سىنىقتاردى قالپىنا كەلتىرۋدىڭ بىرەگەي تەحنولوگياسىن جاساپ شىعاردى، دەپ حابارلايدى اlmaty-akshamy.kz ق ر ءبىلىم جانە عىلىم مينيسترلىگىنىڭ باسپا ءسوز قىزمەتىنە سىلتەمە جاساپ.
ارنايى تەحنولوگيانىڭ ارقاسىندا وپەراسيادان كەيىن 3-6 اي ىشىندە سۇيەك جانە شەمىرشەك تىندەرى قالپىنا كەلەدى. كلينيكاعا دەيىنگى سىناقتاردىڭ ناتيجەلەرى پرەپاراتتىڭ تيىمدىلىگى جوعارى ەكەنىن راستادى.
«سۇيەك اقاۋلارىن تولىقتاي قالپىنا كەلتىرۋ تراۆماتولوگيا مەن ورتوپەدياداعى كۇردەلى جانە شەشىلمەگەن ماسەلەلەردىڭ ءبىرى بولىپ قالا بەرەدى. ەمدەۋ ءۇشىن سۇيەك الماستىرعىشتارىن قولدانا وتىرىپ، وستەوپلاستيكانىڭ ءارتۇرلى ادىستەرى ءجيى قولدانىلادى. ءبىراق بۇل وپەراسيانىڭ ناتيجەسىندە سۇيەك ءاردايىم تولىق قالپىنا كەلمەيدى. ءبىز سۇيەك اقاۋلارىنىڭ تولىق قالپىنا كەلۋىنە ىقپال ەتەتىن تەحنولوگيانى جاسادىق. باعانالى جاسۋشالار مەن تابيعي بيوپوليمەرلەر زاقىمدالعان سۇيەك نەمەسە شەمىرشەك تىندەرىن قالپىنا كەلتىرۋ پروسەسىن جەدەلدەتەدى»، — دەدى ازىرلەمە اۆتورى، ۇلتتىق بيوتەحنولوگيا ورتالىعىنىڭ باعانالى جاسۋشالار زەرتحاناسىنىڭ مەڭگەرۋشىسى، پروفەسسور ۆياچەسلاۆ وگاي.
عالىمنىڭ ايتۋىنشا، گيدروگەلدەر سۇيەك ءتىنىن جاساۋدا قاڭقا رەتىندە قولدانىلادى. قۇرىلىمىندا ولار دانەكەر ءتىنىنىڭ نەگىزىنە ۇقساس، سوندىقتان بارلىق بيوماتەريالدار اراسىندا جاسۋشا ترانسپلانتاسياسى ءۇشىن ەڭ قولايلى.
ءقازىر العاشقى وپەراسيالاردى باعانالى جاسۋشالار نەگىزىندە گيدروگەل ارقىلى جۇرگىزۋ جوسپارلانىپ جاتىر. كۇردەلى سىنىقتار مەن زاقىمدالعان بۋىنداردى قالپىنا كەلتىرۋدىڭ بىرەگەي تەحنولوگياسى تراۆماتولوگيا مەن ورتوپەديادا كورسەتىلەتىن مەديسينالىق قىزمەتتەردىڭ دەڭگەيىن ايتارلىقتاي ارتتىرادى دەپ كۇتىلۋدە. پرەپارات مامانداندىرىلعان اۋرۋحانالار مەن عىلىمي مەديسينالىق ورتالىقتاردا قولدانىلادى.