بۇل تۋرالى ۇكىمەتتىڭ باسپا ءسوز ءمالىم ەتتى.
بيىلدان باستاپ ەنەرگيا كوزدەرىنىڭ جابدىقتارىن كەشەندى جاڭعىرتۋ، سونداي-اق ەلەكتر، جىلۋ، سۋمەن جابدىقتاۋ جانە سۋ تارتۋ جەلىلەرىنىڭ توزۋ دەڭگەيىن تومەندەتۋ ماقساتىندا «ءتاريفتى ينۆەستيسياعا ايىرباستاۋ» باعدارلاماسىن ىسكە اسىرۋ باستالدى. بۇل اپاتتار سانىن ازايتۋعا جانە جالپى ۇسىنىلاتىن كوممۋنالدىق قىزمەتتەردىڭ ساپاسىن ارتتىرۋعا مۇمكىندىك بەرەدى، دەپ حابارلايدى Almaty-akshamy.kz Elorda.info-عا سىلتەمە جاساپ.
بۇگىنگى تاڭدا تكش كاسىپورىندارىنىڭ تاريفتەر مەن ينۆەستيسيالىق باعدارلامالاردى وزگەرتۋگە قاتىستى (جوندەۋ جۇمىستارى مەن قىزمەتكەرلەردىڭ جالاقىسىن كوبەيتۋ، قاراۋسىز جاتقان جەلىلەردى كۇتۋ جانە ت.ب.) 212 ءوتىنىمى بەكىتىلدى. ناتيجەسىندە كوممۋنالدىق قىزمەتتەر تاريفتەرىنىڭ وزگەرۋى 10-30%-دى قۇرادى، مۇندا تۇتىنۋشىلار مەن كوممۋنالدىق قىزمەتتەر مۇددەلەرىنىڭ تەڭگەرىمى ەسكەرىلگەن.
بۇل رەتتە حالىقتىڭ الەۋمەتتىك جاعىنان از قامتىلعان توپتارىنىڭ كوممۋنالدىق قىزمەتتەرگە جۇمسالاتىن شىعىنداردىڭ ءبىر بولىگى وتەلەتىن بولادى. مۇنداي تەتىك مەملەكەتتىك تۇرعىن ءۇي كومەگىن كورسەتۋ اياسىندا كوزدەلىپ وتىر.
ول از قامتىلعان وتباسىلارعا نەمەسە ازاماتتارعا كوممۋنالدىق قىزمەتتەر (جىلۋ، ەلەكتر جانە سۋمەن جابدىقتاۋ، بايلانىس، ليفت قىزمەتى جانە ت. ب.) شىعىندارىن وتەۋ ءۇشىن توقسان سايىن تولەنەدى. باستى شارت – تولەم الۋشىنىڭ مەنشىگىندە قازاقستان اۋماعىندا ءبىر عانا باسپانا بولۋى كەرەك نەمەسە ول مەملەكەتتىك تۇرعىن ءۇي قورىنان، جەكە مەنشىك تۇرعىن ءۇي قورىنان جەرگىلىكتى اتقارۋشى ورگان جالداعان باسپانانى جالعا الۋشى (تەڭ جالعا الۋشى) بولۋى ءتيىس.
بيىل ۇكىمەت ەنگىزگەن وزگەرىستەرگە سايكەس، ەگەر كوممۋنالدىق قىزمەتتەرگە جۇمسالاتىن سوما وتباسىنىڭ نەمەسە ازاماتتىڭ ءبىر ايداعى جيىنتىق تابىسىنىڭ 10%-نان اساتىن بولسا، تۇرعىن ءۇي كومەگى بەرىلەدى. بۇرىن بۇل كورسەتكىش ءار وڭىرگە بايلانىستى 2-20% ارالىعىندا بولعان. بۇل رەتتە اكىمدىكتەر رۇقسات ەتىلگەن شەكتى دەڭگەيدى 10%-دان تومەندەتۋگە قۇقىلى.
مىسالى، ەگەر وتباسىنىڭ نەمەسە ازاماتتىڭ ءبىر ايداعى جيىنتىق تابىسى 100 مىڭ تەڭگەنى، ال كوممۋنالدىق قىزمەتتەرگە جۇمسالاتىن شىعىنى 15 مىڭ تەڭگەنى (تابىستىڭ 10%-دان استامىن) قۇراسا، وندا ازاماتتىڭ جەرگىلىكتى بيۋدجەت قاراجاتى ەسەبىنەن وتەم الۋعا قۇقىعى بار.
ۇكىمەت بەكىتكەن تۇزەتۋ بولاشاق تۇرعىن ءۇي كومەگىن الۋشىلاردى قامتۋدى كەڭەيتۋگە جانە از قامتىلعان ازاماتتارعا قارجىلىق جۇكتەمەنى ازايتۋعا باعىتتالعان.
جالپى سوڭعى 4 جىلدا 174 مىڭنان استام ابونەنتكە تۇرعىن ءۇي كومەگى ءۇشىن جالپى سوماسى 5 ملرد تەڭگە تولەندى. ال وسى جىلدىڭ 6 ايىندا 31 مىڭ وتباسىنا 630،5 ملن تەڭگەگە كومەك كورسەتىلدى.
وسىلايشا، كوممۋنالدىق قىزمەتتەر تاريفتەرى كوتەرىلگەن جاعدايدا وتەماقى دا ۇلعايادى، ياعني از قامتىلعان ازاماتتاردىڭ شىعىندارى ۇلعايمايدى.
تۇرعىن ءۇي كومەگىن تاعايىنداۋ ءۇشىن ازاماتتارعا تۇرعىلىقتى جەرى بويىنشا اكىمدىككە جۇگىنۋ قاجەت.