اۆتومەكتەپتەرگە سىناق ەمتيحانى ەنگىزىلەدى

قازاقستاندا جۇرگىزۋشى كۋالىگىن بەرۋ ءۇشىن كۋرسانتتاردى وقىتاتىن اۆتومەكتەپتەردىڭ قىزمەتىنە كىرەتىن مىندەتتەر كوبەيەدى.

بۇل تۋرالى "ازاماتتارعا ارنالعان ۇكىمەت" مەملەكەتتىك كورپوراسياسىنىڭ باسقارما ءتوراعاسى سۇيەنىش ءابدىلدين مالىمدەدى، دەپ حابارلايدى Almaty-akshamy.kz 

"قازىرگى تاڭدا ءبىرىنشى رەت سىناقتان وتە الماعان كۋرسانتقا تاعى مۇمكىندىك بەرىلەدى. اراعا 7 كۇن سالىپ، ەمتيحاندى قايتا تاپسىرۋعا بولادى. ورتا ەسەپپەن جۇرگىزۋشى كۋالىگىن العىسى كەلەتىندەر ەمتيحاندى 3-5 رەت تاپسىرعان سوڭ وتەدى"، – دەدى سۇيەنىش ءابدىلدين.

باسقارما ءتوراعاسىنىڭ ايتۋىنشا، كۋرسانت جۇرگىزۋشى كۋالىگىن بىرنەشە سانات بويىنشا العىسى كەلسە، وندا 7 كۇن كۇتپەي، سىناقتى كۇن سايىن تاپسىرا الادى.

"وسىعان بايلانىستى مامانداندىرىلعان حالىققا قىزمەت كورسەتۋ ورتالىقتارىندا ۇزىن-سونار كەزەك پايدا بولىپ جاتىر. حقو جۇمىسىن جەتىلدىرىپ، اۆتوماتتاندىرۋ بويىنشا شارا قابىلدايمىز. بۇل ازدىق ەتەتىندىكتەن، ىشكى ىستەر مينيسترلىگىمەن بىرلەسىپ اۆتومەكتەپتەردىڭ جاۋاپكەرشىلىگىن قاتاڭداتۋ جاعىن قاراپ جاتىرمىز. دالىرەك، اۆتومەكتەپتەردە سىناق ەمتيحانىن ەنگىزەمىز. وسى شارا كۋرسانتتاردىڭ حالىققا قىزمەت كورسەتۋ ورتالىعىنا جاقسى دايىندىقپەن كەلىپ، سىناقتان بىردەن سۇرىنبەي وتۋىنە سەبەپ بولادى. مۇنىمەن قاتار، ورتالىقتارداعى كەزەك سانى ازايادى"، – دەدى ول.