الماتىدا 500 مىڭنان استام اعاش تامشىلاتىپ سۋارۋمەن قامتىلعان.
بۇل تۋرالى الماتى قالاسىنىڭ اكىمى ەربولات دوسايەۆ جۇمىس ساپارى اياسىندا بوستاندىق اۋدانىنىڭ تۇرعىندارىمەن كەزدەسۋدە مالىمدەدى، دەپ حابارلايدى Almaty-akshamy.kz
قالا تۇرعىندارى جاسىل جەلەكتەرگە اۆتوماتتى سۋارۋ جۇيەسىن ۇيىمداستىرۋدى سۇرادى. ەربولات دوسايەۆ كوگالداندىرۋ ماسەلەسىن شەشۋ ءۇشىن شەتەلدىك تاجىريبە مۇقيات زەرتتەلگەنىن اتاپ ءوتتى.
2023 جىلى جاسىل جەلەكتەردى كۇتىپ ۇستاۋ جانە قورعاۋ بويىنشا جاڭا ەرەجەلەر قابىلداندى. جاڭا كوشەتتەرگە قويىلاتىن تالاپ ەداۋىر كۇشەيتىلدى، جاسىل ەكپەلەردى كۇتۋ جانە قورعاۋ جونىندەگى نورماتيۆتەر كوبەيدى، سونىمەن بىرگە سۋارۋ جۇيەسىنىڭ بولۋى كوزدەلگەن.
«اباي داڭعىلىنىڭ بويىندا اۆتوماتتى سۋارۋ جۇيەسى قاراستىرىلعان. بۇگىندە كوگالداردى قالپىنا كەلتىرۋ جوباسى ازىرلەنىپ جاتىر. بۇعان قاجەتتى جەلىلەر بار»، - دەدى ەربولات دوسايەۆ.
سۋارۋ جۇيەسىن ۇيىمداستىرۋ ءۇشىن مەگاپوليستە 29 ۇڭعىما جانە 5 سۋ جيناعىش سالىندى. جاسىل قوردى ساقتاۋ ماقساتىندا الماتىدا 2،3 ملن جاسىل جەلەكتى ءتۇرلى زيانكەستەرگە بيووڭدەۋ جۇرگىزىلۋدە. 2025 جىلعا دەيىن 1،2 ملن كوشەت وتىرعىزۋ جوسپارعا ەنگەن.