اۆتوكولىكتىڭ مەملەكەتتىك تىركەۋ ءنومىرى بەلگىسىنە ونىڭ ءتۇپنۇسقالىعىن تەكسەرۋگە مۇمكىندىك بەرەتىن بىرەگەي DMC كود سالىنادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ق ر ست 986-2022 ستاندارتى 1 قىركۇيەكتەن باستاپ قولدانىسقا ەنگىزىلدى. وندا بۇرمالاۋدان (قولدان جاساۋدان) قورعاۋ ءۇشىن ءنومىر بەلگىلەرىندە ارنايى جانە قوسىمشا ەلەمەنتتەر بولۋى تيىستىگى تۋرالى تالاپتار جازىلعان.
«ستاندارت مەملەكەتتىك تىركەۋ ءنومىرى بەلگىلەرىندەگى قارىپتەرگە، ساندارعا جانە قورعانىس ەلەمەنتتەرىنە قويىلاتىن تەحنيكالىق تالاپتاردى بىرىزدەندىرۋدى قامتاماسىز ەتەدى.
قوسىمشا قورعانىس ەلەمەنتتەرىنە پوليسيا قىزمەتكەرلەرى مەملەكەتتىك نومىرلەردىڭ ءتۇپنۇسقالىعىن تەكسەرە الاتىن بىرەگەي DMC كود سالۋ دا جاتقىزىلدى.
ارنايى قورعانىس ەلەمەنتتەرىن ءنومىر بەلگىسىنىڭ بەتىنەن حيميالىق قۇرالدارمەن نەمەسە فيزيكالىق جولمەن الىپ تاستاۋ مۇمكىن ەمەس جانە ءنومىر بەلگىسىنىڭ بۇكىل پايدالانۋ مەرزىمى ىشىندە ساقتالۋى ءتيىس»، - دەلىنگەن باسپا ءسوز مالىمدەمەسىندە.
ۆەدومستۆو مالىمەتىنشە، جاڭا ستاندارتتىڭ قولدانىسقا ەنگىزىلۋى اۆتوكولىكتىڭ مەملەكەتتىك تىركەۋ ءنومىرى بەلگىسىن دايىنداۋ باعاسىنا اسەر ەتپەيدى، سونداي-اق بيۋدجەتتەن قوسىمشا شىعىن بولمايدى.
ستاندارتتى ىشكى ىستەر مينيسترلىگىنىڭ «اقپاراتتىق-وندىرىستىك ورتالىق» رمك-سى ازىرلەپ، Cاۋدا جانە ينتەگراسيا مينيسترلىگى تەحنيكالىق رەتتەۋ جانە مەترولوگيا كوميتەتىنە قاراستى قازستاندارتتا ساراپتامادان وتكەن.