قازاقستان رەسپۋبليكاسى مەن كورەي رەسپۋبليكاسى اراسىنداعى ديپلوماتيالىق قارىم-قاتىناستاردىڭ 30 جىلدىعى شەڭبەرىندە الماتى جانە پۋسان قالالارىنىڭ اراسىندا دوستىق پەن ىنتىماقتاستىق ورناتۋ تۋرالى مەموراندۋمعا قول قويۋ ءراسىمى ءوتتى.
مەموراندۋم ءتۇرلى سالالاردا، ونىڭ ىشىندە، ەكونوميكا، تۋريزم، مادەنيەت، ءبىلىم، شىعارماشىلىق يندۋستريا (كينو جانە سيفرلىق مەديالار) سالالارىندا ءوزارا ىنتىماقتاستىقتى كوزدەيدى. قۇجاتقا الماتى قالاسى اكىمىنىڭ ورىنباسارى الىشەر ءابدىقادىروۆ، سونداي-اق پۋسان قالاسىنىڭ ەكونوميكا جونىندەگى ۆيسە-مەرى لي سونگۆۋن قول قويدى، دەپ حابارلايدى Almaty-akshamy.kz.
سونداي-اق، كەزدەسۋ شەڭبەرىندە الماتى قالاسى كاسىپكەرلىك جانە ينۆەستيسيالار باسقارماسى مەن پۋسان قالاسىنىڭ ەكونوميكاسىن ىلگەرىلەتۋ اگەنتتىگى اراسىندا ىنتىماقتاستىق تۋرالى كەلىسىم جاسالدى. قۇجاتقا الماتى قالاسى كاسىپكەرلىك جانە ينۆەستيسيالار باسقارماسىنىڭ باسشىسى بەرىك سولتانبايەۆ جانە پۋسان قالاسىنىڭ ەكونوميكاسىن ىلگەرىلەتۋ اگەنتتىگى جاھاندىق بيزنەستى قولداۋ دەپارتامەنتىنىڭ ديرەكتورى كيم دجاەگاب قول قويدى.
پۋسان قالاسىنىڭ دەلەگاسياسى الماتى قالاسىنا ىسساپارمەن «ەۋرازيالىق ەكسپەديسيا» شەڭبەرىندە كەلدى. ونىڭ نەگىزگى ميسسياسى ەۋروپا مەن ازيانىڭ بەلگىلى ءبىر ەلدەرىمەن دوستىق قارىم-قاتىناستار ورناتۋ، جەرگىلىكتى حالىقپەن مادەنيەت جانە ءبىلىم سالاسىندا تاجىريبە الماسۋ، «ەكسپو-2030» كورمەسىن (پۋسان قالاسى) ىلگەرىلەتۋ شەڭبەرىندە پۋسان قالاسىنىڭ تانىمالدىلىعىن ارتتىرۋ بولىپ تابىلادى.