اۆتوكولىكتى ۋاقىتشا تىركەۋ مەرزىمى ۇزارتىلدى

ەۋرازيالىق ەكونوميكالىق وداق ەلدەرىنەن بىلتىرعى جىلدىڭ 1 قىركۇيەگىنە دەيىن اكەلىنگەن كولىكتەردى ۋاقىتشا تىركەۋ مەرزىمى ۇزارتىلدى، دەپ حابارلايدى almaty-akshamy.kz

سونداي-اق، بۇرىن زاڭداستىرۋعا قۇجاتى تاپسىرىلعانىمەن، ءوتىنىشى كەرى قايتارىلعان كولىكتەر دە وسى مۇمكىندىكتى پايدالانا الادى. بۇگىنگە دەيىن 9 مىڭنان استام تەمىر تۇلپار ۋاقىتشا تىركەۋگە الىندى.

وزگەرىس ەۋرازيالىق ەكونوميكالىق وداق ەلدەرىنەن بىلتىر 1 قىركۇيەككە دەيىن اكەلىنگەن كولىكتەرگە قاتىستى. بەس جىلعا دەيىن ۋاقىتشا تىركەۋگە بولادى. مامانداردىڭ ايتۋىنشا، تىركەۋ مەرزىمىن ۇزارتۋدىڭ بىرنەشە سەبەبى بار. كەيدە كولىكتىڭ يەسىن تابۋ مۇمكىن ەمەس، كەيدە قارجىلىق ۇيىمدا كەپىلدە تۇرادى. ماسەلە ءتۇرلى دەڭگەيدە بىرنەشە مارتە كوتەرىلدى. 

1 شىلدەگە دەيىن زاڭداستىرۋعا قۇجاتى تاپسىرىلعانىمەن، زاڭداستىرىلماعان كولىكتەر دە ۋاقىتشا تىركەۋگە قويىلادى. قازاقستانداعى قوجايىنى وسى مەرزىمدە قۇجاتىن رەتتەۋى ءتيىس. بۇل ۋاقىتتا كولىك شەكارادان اسپايدى. ەگەر، ماسەلە شەشىلمەسە، بەس جىلدان كەيىن ەل اۋماعىنان شىعارىلادى.

تىركەلگەن كولىكتەردىڭ باسىم بولىگى رەسەي مەن ارمەنيادان اكەلىنگەن. سونداي-اق، بۇگىندە بىلتىرعى 1 قىركۇيەكتەن كەيىن جەتكىزىلگەن كولىكتەرگە دە قاتىستى ماسەلە تۋىنداپ جاتىر.

مامانداردىڭ سوزىنە سۇيەنسەك، 1 قىركۇيەكتەن بەرى ەل اۋماعىنا ەنگەن كولىكتەردىڭ بارلىعى قوسالقى بولشەك رەتىندە كىرگىزىلگەن. ول كولىكتەر «اۆتوكونسترۋكتور» رەتىندە تىركەۋگە قويىلادى. ءبىراق، ەل اۋماعىنان شىعۋعا نەمەسە باسقا ادامعا ساتۋعا رۇقسات جوق.