اۆستريادا قازاق ءتىلىن ۇيرەنۋگە قىزىعۋشىلىق ارتتى

ۆەنا جۇرەگىندە ورنالاسقان «Edustream» ءتىل مەكتەبىندە اۆسترياداعى قازاقستان ەلشىلىگىنىڭ قولداۋىمەن قازاق ءتىلى كۋرسى جانە كىتاپحانا اشىلدى-دەپ حابارلايدى Almaty-akshamy.kz. 

باستاپقىدا ماقسات، ءتۇرلى سەبەپپەن اۆستريادا تۇراتىن قازاقستاندىق بالالاردى قولداۋ بولعان. الايدا ەرىكتى پەداگوگتار جۇرگىزەتىن تەگىن كۋرسقا كۇتپەگەن جەردە تامىرى قازاق دەگەن 19 عاسىردان بەرى كوشىپ كەتكەن باۋىرلار دا كەلە باستادى. كوبىنىڭ قانى ارالاسىپ، ەسىمى قىتايشا، تۇرىكشە بولعانمەن، ولار قانشا جەردەن جىراقتا، ەلدەن ەلگە كوشىپ جۇرسە دە، قان تارتىپ تۇرادى.

- ولاردىڭ ءتىل دەڭگەيى ءارتۇرلى بولعانمەن، قىزىعۋشىلىعى زور. كەيبىر وقۋشىلار قازاق ءتىلىن گەنەتيكالىق تۇرعىدا ۇمىتسا دا، بار ىنتاسىمەن وقيدى، سول ارقىلى تۇپكى تامىرىن تاپقىسى كەلەدى. نەگىزى، ءبىز كاسىبي پەداگوگ ەمەسپىز، ءبىز ەلىمىز بەن ءداستۇرىمىزدىڭ دامۋىنا ۇلەس قوسۋدى كوزدەگەن قاراپايىم ەرىكتىمىز. ساباعىمىزدا «ءتىل قازىنا» عىلىمي ورتالىعىنىڭ ادىستەمەسى مەن وقۋلىعىن قولدانامىز. ءتىل ۇيرەنەمىن دەگەن ادامعا ءقازىر وقۋ الاڭى، سايت، ارنا، قوسىمشا دەگەننىڭ ءتۇرى كوپ، ءبىز سولاردىڭ ءبارىن ساباقتا قولدانا وتىرىپ مۋزىكا تىڭدايمىز، كىتاپ وقيمىز. بولاشاقتا وقۋشىلارىمىز قازاقتىڭ كورنەكتى جازۋشىلارى مەن اقىندارىنىڭ تاماشا تۋىندىلارىن تامسانا وقي الاتىنداي قازاقشانى جەتىك مەڭگەرەدى دەپ ۇمىتتەنەمىن - دەيدى ۇستازدارى انار ادىلبەكوۆا.

بارلىق وقۋشى نەمىس تىلىندە سويلەيدى، سوندىقتان ءدارىس نەمىسشە جۇرەدى. «Edu Stream» مەكتەبى ساباقپەن قاتار قازاقستاننىڭ بارلىق مەرەكەسىن بەلسەندى تۇردە اتاپ وتەدى. بۇل دا ءوز كەزەگىندە سالتىمىز بەن ءداستۇرىمىزدى ناسيحاتتاۋدىڭ ءبىر جولى. اۆسترياداعى ديپلوماتتارىمىز وقۋ ورتالىعىن ۇنەمى قولداپ تۇرادى. ەندى قازاق تىلىنە ەۋروپانىڭ وزگە ەلىندە تۇراتىن ەتنيكالىق قازاقتار قىزىعۋشىلىق تانىتقاندىقتان، بۇل كۋرستى جالپى ەۋروپالىق ساباققا اينالدىرۋ جوسپاردا بار.