قارىنداسىن قورعاۋ ءۇشىن قۇتىرعان يتپەن جالعىز الىسقان بالدىرعان «الەمنىڭ ۇزدىك كۇرەسكەرى» اتاندى
التى جاستاعى بريدجەر ۋولكەر (اقش-تىڭ شايەنن قالاسىنان) كىشكەنتاي قارىنداسىن قۇتىرعان ءداۋ ءيتتىڭ اۋزىنان امان الىپ قالدى. ءبىراق ءوزى ايتارلىقتاي جاراقاتتانعان. بەتىنە 90 جەردەن تىگىس تۇسكەن بالاقاي ءبىر كۇندە الەۋمەتتىك جەلىنىڭ جۇلدىزىنا اينالىپ كەتتى.
«ۇلىم كوپ قان جوعالتتى، ءولىپ قالاتىن شىعار دەپ قاتتى ۋايىمدادىق. قۇتىرعان ءيتتىڭ تىستەرى ونىڭ بەتىنىڭ تەرىسىن تۇگەل جۇلمالاپ تاستاعان، سالبىراپ، ارعى جاعىنان سۇيەگى كورىنىپ تۇردى. دارىگەرلەردىڭ التىن قولىنىڭ ارقاسىندا قالىپتى ومىرگە قوسىلدىق»، – دەيدى بالانىڭ اكەسى روبەرت ۋولكەر.
ونىڭ ايتۋىنشا، بۇل وقيعا تۋرالى ب ا ق بەتتەرىنە نەمەسە الەۋمەتتىك جەلىگە سالۋ تۋرالى مۇلدەم ويلاماپتى. وزدەرىمەن-وزدەرى قايعى بولىپ جۇرگەندە، بالانىڭ اپكەسى نيكول ۆيدەونى Instagram پاراقشاسىنا جۇكتەپ جىبەرەدى. سوندا بارىپ بۇكىل امەريكا قاھارمان بالاقاي تۋرالى حاباردار بولعان ەكەن.
«ەگەر ءقازىر ەكەۋىمىزدىڭ بىرەۋمىز ءولۋىمىز كەرەك بولسا، وندا مەنىڭ ولگەنىم دۇرىس»، – دەپ ويلاعان ەكەن التى جاسار بالدىرعان وزدەرىنە يت شابا باستاعان ساتتە. ونىڭ باق-قا بەرگەن بۇل ءسوزى اۋىزدان-اۋىزعا تاراپ كەتتى.
وسى ەرلىگىنەن سوڭ وجەت بالاعا گولليۆۋد جۇلدىزدارى، تانىمال اكتەرلار حابارلاسا باستاعان. «مستيتەلي» كينوكارتيناسىنىڭ وكىلدەرى وعان تەلەفون سوعىپ، سىيلىقتار جونەلتكەن. ال برەت مايكلس دەگەن تانىمال روك-ورىنداۋشى بولسا، اۆتورلىق قولتاڭباسىمەن بىرگە اكۋستيكالىق گيتارا اكەپ سىيلاعان. دۇنيەجۇزىلىك بوكسەرلىك كەڭەس (WBC) بولسا، قايسار بالدىرعاندى «الەمنىڭ قۇرمەتتى چەمپيونى» دەپ تانىعان. كىشكەنتاي امەريكاندىقتىڭ ۇلكەن ەرلىگى «WBC تاريحىنداعى تاريحي رەكورد» دەپ باعالانعان. ال بالانىڭ وزىنە «الەمنىڭ ۇزدىك كۇرەسكەرى» اتاعى بەرىلگەن.
بالكىم، بريدجەر بولاشاقتا كاسىبي بوكسقا دەن قويار، كىم ءبىلسىن. ءبىراق ول ءقازىر اكەسىمەن بىرگە دجيۋ-دجيتسۋمەن اينالىسىپ جۇرگەن كورىنەدى. «ۇلىم بۇگىندە ەسەيىپ قالدى، وزىنە-وزى تىم سەنىمدى، باتىل بولىپ كورىنەدى ماعان. مەنىڭشە، ونىڭ قارىنداسىن دا، ءوزىن دە ازۋلى يتتەن قۇتقارىپ قالۋعا دجيۋ-دجيتسۋ كومەكتەستى دەپ ويلايمىن»، – دەيدى جۇرەگىن ماقتانىش كەرنەگەن اكەسى روبەرت.
ازىرلەگەن نۇر جامال.