«اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى ىسكە قوسىلادى. بۇل تۋرالى ۇكىمەت وتىرىسىندا ق ر دەنساۋلىق ساقتاۋ ءمينيسترى اجار عينيات ايتتى، دەپ حابارلايدى Almaty-akshamy.kz Inform.kz-كە سىلتەمە جاساپ.
«پرەزيدەنت 2023 جىلدان باستاپ اۋىل تۇرعىندارىنىڭ مەديسينالىق كومەككە سۇرانىسىن قاناعاتتاندىرۋعا ارنالعان ۇلتتىق جوبانى ىسكە اسىرۋدى تاپسىردى. وسى ماقساتتا ءبىز «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسىن ىسكە قوسۋ جانە ىسكە اسىرۋ ءۇشىن ءتيىستى ەسەپتەمەلەر جۇرگىزىپ، قاجەتتى شارالاردى ايقىندادىق. ۇلتتىق جوبانىڭ نەگىزگى ماقساتى - بارلىق اۋىلدىق ەلدى مەكەندەردى نورماتيۆتەرگە سايكەس العاشقى مەديسينالىق-سانيتارلىق كومەك ۇيىمدارىمەن قامتاماسىز ەتۋ ەسەبىنەن قالالىق جانە اۋىلدىق دەنساۋلىق ساقتاۋ اراسىنداعى الشاقتىقتى قىسقارتۋ، سونداي-اق اۋىل تۇرعىندارىنا شۇعىل مەديسينالىق كومەكتى ۋاقتىلى كورسەتۋدى ارتتىرۋ»، - دەدى ول.
ءمينيستردىڭ دەرەگىنشە، ۇلتتىق جوبا اياسىندا 655 العاشقى مەديسينالىق-سانيتارلىق كومەك نىسانى، ونىڭ ىشىندە جاڭا 228 نىسان جانە قولدانىستاعى مەديسينالىق-سانيتارلىق العاشقى كومەك وبەكتىلەرىنىڭ ورنىنا 427 نىسان سالىنادى. 32 كوپ بەيىندى ورتالىق اۋداندىق اۋرۋحانالاردى ۇيىمداستىرۋ، ونىڭ ىشىندە قولدانىستاعى 12 اۋرۋحانانى جەتىلدىرۋ قامتاماسىز ەتىلەدى. سونىمەن قاتار «التىن ساعات» قاعيداتىن ساقتاي وتىرىپ، ينفاركت، ينسۋلت، بوسانۋ، جاراقاتتار كەزىندە جانە باسقا جاعدايلاردا شۇعىل مەديسينالىق كومەك كورسەتە الاتىن، سونداي-اق ءىرى قالالارعا بارماي-اق، تەلەمەديسينا جانە قاشىقتىقتان مەديسينالىق قىزمەتتەر ارقىلى مامانداندىرىلعان جانە جوعارى تەحنولوگيالىق مەديسينالىق كومەك كورسەتە الاتىن جاڭا كوپ بەيىندى ورتالىق اۋداندىق اۋرۋحانالار اشۋ قامتاماسىز ەتىلەدى.
«ۇلتتىق جوبانى ىسكە اسىرۋ اۋىل تۇرعىندارى اراسىندا قان اينالىمى جۇيەسى اۋرۋلارىنىڭ ءولىم-جىتىمىن 23،6 پايىزعا تومەندەتۋگە، 4 ميلليوننان استام اۋىل تۇرعىندارىن ساپالى، جەدەل جانە جوعارى تەحنولوگيالىق مەديسينالىق كومەكپەن قامتاماسىز ەتۋگە مۇمكىندىك بەرەدى»، - دەدى اجار عينيات.