مارافوننىڭ ماقساتى – وتاندىق اۋىل شارۋاشىلىعى ونىمدەرىنىڭ باسەكەگە قابىلەتتىلىگىن ارتتىرۋ، حالىق قولونەرىنىڭ ەلەمەنتتەرىن ساقتاۋ جانە كورسەتۋ، اۋىلداردى تۇراقتى دامىتۋ.
قازاقستان رەسپۋبليكاسى تاۋەلسىزدىگىنىڭ 30 جىلدىعىن مەرەكەلەۋ اياسىندا اۋىلدىق جەرلەردە تۇراتىن ازاماتتاردىڭ ءومىر ءسۇرۋ ساپاسى مەن ءال-اۋقاتىن جاقسارتۋ ماقساتىندا 1 قازاننان باستاپ «اۋىلدىڭ گۇلدەنۋى-قازاقستاننىڭ گۇلدەنۋى» مارافونى باستالدى، دەپ حابارلايدى Almaty-akshamy.kz ق ر اۋىل شارۋاشىلىعى مينيسترلىگىنىڭ باسپا ءسوز قىزمەتىنە سىلتەمە جاساپ.
ءىس-شارا اياسىندا وتاندىق وندىرۋشىلەردىڭ اۋىل شارۋاشىلىعى سالاسىنداعى جەتىستىكتەرى مەن ونىمدەرىنىڭ كورمە-جارمەڭكەلەرىن ۇيىمداستىرۋ، دەرەكتى فيلمدەر ءتۇسىرۋ، اۋىل ەڭبەككەرلەرىنىڭ، ەڭبەك ەرلەرىنىڭ، عالىمداردىڭ، اۋىل جانە اۋدانداردىڭ قۇرمەتتى ازاماتتارىنىڭ قاتىسۋىمەن اۋىل ءومىرى تۋرالى ماقالالار جاريالاۋ جوسپارلانۋدا. جەرگىلىكتى اتقارۋشى ورگاندار تاراپىنان ۇيىمداستىرىلاتىن ءىس-شارالار نەگىزىنەن اۋىل شارۋاشىلىعى تاۋارلارىن ىشكى جانە سىرتقى نارىقتارعا شىعارۋعا، ازاماتتاردى اۋىل شارۋاشىلىعى سالاسىندا قول جەتكىزىلگەن جەتىستىكتەرمەن تانىستىرۋعا، قازاقستاندىق مەملەكەتتىلىكتى ساقتاۋعا جانە نىعايتۋعا، قازاقستان ازاماتتارىنىڭ بىرلىك جانە پاتريوتيزم سەزىمدەرىن كۇشەيتۋگە باعىتتالاتىن بولادى.
«ءىس-شارالار ەپيدەميولوگيالىق جاعدايدى ەسكەرە وتىرىپ، 2021 جىلعى 1-31 قازان ارالىعىندا قالالاردا، اۋداندار مەن اۋىلداردا وتكىزىلەتىن بولادى»، - دەلىنگەن مينيسترلىكتىڭ حابارلاماسىندا.