بۇل ق ر پرەزيدەنتىنىڭ تاپسىرماسى بويىنشا جۇزەگە اسپاق.
بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە الماتى قالاسى كاسىپكەرلىك جانە ينۆەستيسيالار باسقارماسى باسشىسىنىڭ ورىنباسارى دامير تازابەك مالىمدەدى، دەپ حابارلايدى Almaty-akshamy.kz
ەسكە سالساق، مەملەكەت باسشىسى قاسىم-جومارت توقايەۆ ءوزىنىڭ قازاقستان حالقىنا ارناعان سوڭعى جولداۋىندا جەرگىلىكتى اتقارۋشى ورگاندارعا وندىرۋشىلەردىڭ تىزبەگى بويىنشا باعالاردى باقىلاۋدى قامتاماسىز ەتۋدى تاپسىرعان بولاتىن.
«اعىمداعى جىلدىڭ قاراشا ايىندا الماتى يندۋستريالىق ايماعىنىڭ ماڭىندا 17 گەكتار الاڭدا «ۇلتتىق ساۋدا-تاراتۋ جەلىسى» ج ش س تاراتۋ ورتالىعىنىڭ قۇرىلىسىن باستاۋ جوسپارلانعان. پايدالانۋعا بەرۋ 2023 جىلدىڭ باسىندا كۇتىلۋدە. جەكە ينۆەستور جوبانى مەملەكەتتىك-جەكەشەلىك ارىپتەستىك شەڭبەرىندە ىسكە اسىرادى. كتو-نىڭ بۇل جوباسى بۇكىل ەل بويىنشا 24 كوتەرمە-تاراتۋ ورتالىقتارىنان تۇراتىن ۇلتتىق تاۋار وتكىزۋ جۇيەسىن قۇرۋ جونىندەگى جوبانىڭ قۇرامداس بولىگى بولىپ تابىلادى»، - دەپ حابارلادى دامير تازابەك.
جوبا اياسىندا ينۆەستيسيا سوماسى 35 ملرد تەڭگەنى قۇرايدى. بۇل سۋارمالى جەرلەردە وسىرىلەتىن ءونىم كولەمىن ۇلعايتۋدى قوسا العاندا، جەمىس-كوكونىس ونىمدەرى ءوندىرىسىنىڭ ءوسۋىنىڭ نەگىزگى فاكتورى بولادى دەپ كۇتىلۋدە. بۇل رەتتە ازىق-تۇلىكتى ساقتاۋدىڭ، ساتۋدىڭ جانە ءبولۋدىڭ جاڭا تەحنولوگياسى قۇرىلاتىن بولادى. كوتەرمە ساۋدا ورتالىقتارى ءونىمدى ساقتاۋ مەن وڭدەۋدەن باستاپ تاراتۋ مەن ساتۋعا دەيىن مامانداندىرىلعان قىزمەتتەردى ۇسىنادى.
بۇگىندە باس مەردىگەرمەن بىرگە جوبانىڭ جوبالىق-سمەتالىق قۇجاتتاماسى ازىرلەندى. جوبانىڭ تەحنيكالىق-ەكونوميكالىق نەگىزدەمەسى مەملەكەتتىك ساراپتامادان ءوتتى.