«اۋىلدا دەنساۋلىق ساقتاۋدى جاڭعىرتۋ» ۇلتتىق جوباسىن ىسكە اسىرۋ ماسەلەسى ۇكىمەتتە پرەمەر-مينيستر ولجاس بەكتەنوۆتىڭ توراعالىعىمەن وتكەن وتىرىستا قارالدى.
پرەزيدەنت قاسىم-جومارت توقايەۆتىڭ اۋىلداعى مەديسينالىق كومەكتىڭ قولجەتىمدىلىگىن ارتتىرۋ جانە ساپاسىن جاقسارتۋ بويىنشا قويعان مىندەتتەرىنىڭ ورىندالۋى تۋرالى دەنساۋلىق ساقتاۋ ءمينيسترى اقمارال ءالنازاروۆا باياندادى، دەپ حابارلايدى almaty-akshamy.kz.
وتكەن جىلدىڭ قورىتىندىسى بويىنشا قازاقستاندا 99 العاشقى مەديسينالىق-سانيتارلىق كومەك نىسانى سالىندى.
بيىلعا 556 مەديسينالىق جانە فەلدشەرلىك پۋنكتتەر، سونداي-اق دارىگەرلىك امبۋلاتوريالار سالۋ كوزدەلگەن. قازىرگى ۋاقىتتا قۇرىلىس-مونتاج جۇمىستارى 322 نىساندا باستالىپ، 3 نىساندا اياقتالدى، دەپ حابارلادى اقمارال ءالنازاروۆا
بۇل رەتتە دەنساۋلىق ساقتاۋ مينيسترلىگى ونەركاسىپ جانە قۇرىلىس مينيسترلىگىمەن بىرلەسىپ، مەملەكەتتىك ساراپتاما قورىتىندىسىنىڭ نەگىزىندە جوبالاۋ-سمەتالىق قۇجاتتامانى ازىرلەپ، بايلانىستىرۋدى تولىق اياقتادى. جالپى، ۇلتتىق جوبادا ىسكە اسىرۋدىڭ بارلىق كەزەڭىندە 655 العاشقى مساك نىسانىنىڭ قۇرىلىسى قاراستىرىلعان. سونداي-اق 32 ورتالىق اۋداندىق اۋرۋحانانى جاڭعىرتۋ كوزدەلۋدە. قازىرگى ۋاقىتتا 10 نىساندا ءتيىستى جۇمىستار جۇرگىزىلىپ جاتىر، 2 مەديسينالىق مەكەمەگە كۇردەلى جوندەۋ جۇمىستارى اياقتالدى.
2023-2024 جىلدار كەزەڭىندە 152 دەنساۋلىق ساقتاۋ وبەكتىسىندە 656 مەديسينا قىزمەتكەرى جۇمىسقا ورنالاستىرىلدى. بۇل رەتتە ۇلتتىق جوبا شەڭبەرىندە كادرلارعا جالپى قاجەتتىلىك 1 100 مەديسينا قىزمەتكەرىن قۇرادى. ۇكىمەت وتىرىسى بارىسىندا قاراعاندى، جەتىسۋ جانە الماتى وبلىستارى اكىمدەرىنىڭ باياندامالارى تىڭدالدى.
كەستەدەن ارتتا قالۋ جانە اۋىلدىق اۋماقتاردا مساك وبەكتىلەرىن سالۋ بويىنشا جۇمىستى كۇشەيتۋ، جانداندىرۋ قاجەتتىگى اتاپ ءوتىلدى. ماسەلەن، جىل سوڭىنا دەيىن دەنساۋلىق ساقتاۋ ۇيىمدارىنىڭ ەڭ كوپ سانى قاراعاندى وبلىسىندا سالىنۋى ءتيىس. بۇل رەتتە ىسكە اسىرۋعا جوسپارلانعان 78 نىساننىڭ تەك ۇشتەن بىرىندە عانا جۇمىس باستالعان. جەتىسۋ وبلىسىندا وبەكتىلەردىڭ تەك 75%-ى بويىنشا قۇرىلىس-مونتاجداۋ جۇمىسىنا شارت جاسالدى.
پرەمەر-مينيستر وسى جىلى اياقتالاتىن ۇلتتىق جوبانى ىسكە اسىرۋ ۇكىمەتتىڭ باسىم مىندەتتەرىنىڭ ءبىرى ەكەنىن اتاپ ءوتتى.
پرەزيدەنتتىڭ اۋىلدىق اۋماقتاردا مەديسينالىق ۇيىمدار سالۋ جونىندەگى تاپسىرماسىن ورىنداۋ ماسەلەسى ەرتەرەك – وسى جىلدىڭ اقپان ايىندا قارالدى. وتكەن كەزەڭدە ۇلكەن جۇمىس جۇرگىزىلدى، دەپ اتاپ ءوتتى ولجاس بەكتەنوۆ — بارلىق جوبالاردىڭ جوبالىق-سمەتالىق قۇجاتتاماسىنا مەملەكەتتىك ساراپتاما اياقتالدى، مەردىگەرلەر انىقتالدى، جۇمىستار باستالدى.
«اكىمدىكتەر بارلىق نىساننىڭ قۇرىلىس جۇمىستارىن ۋاقتىلى ءارى ساپالى جۇرگىزۋ ءۇشىن كۇندەلىكتى باقىلاۋدى كۇشەيتۋى كەرەك. قاراعاندى، اقتوبە، پاۆلودار، باتىس قازاقستان، جەتىسۋ جانە الماتى وبلىستارى اكىمدەرىنىڭ نازارىن وسىعان اۋدارعىم كەلەدى. قۇرىلىس ماۋسىمى، اسىرەسە سولتۇستىك وڭىرلەر ءۇشىن تەز اياقتالاتىنىن ەسكەرۋ قاجەت. بارلىق وبەكتىلەر بەلگىلەنگەن مەرزىمدە پايدالانۋعا بەرىلۋگە ءتيىس. بۇل رەتتە قۇرىلىس جۇمىستارىنىڭ نورماتيۆتىك تالاپتارىنىڭ ساقتالۋىن دا قامتاماسىز ەتۋ كەرەك»، — دەدى ولجاس بەكتەنوۆ.
پرەمەر-مينيستر سونداي-اق كوپسالالى اۋداندىق اۋرۋحانالاردى جوندەۋ جۇمىستارىن جالعاستىرۋ جانە دەنساۋلىق ساقتاۋ ۇيىمدارىن ساپالى جاراقتاندىرۋ ءۇشىن قاجەتتى مەديسينالىق جابدىقتاردىڭ تىزبەسىن قالىپتاستىرۋ قاجەتتىگىن اتاپ ءوتتى.
ۇكىمەت باسشىسى ۇلتتىق جوبانى ىسكە اسىرۋعا 60،3 ملرد تەڭگە بولىنگەنىن، ونىڭ 21 ملرد تەڭگەدەن استامى وڭىرلەرگە بەرىلگەنىن اتاپ ءوتتى. قالعان وبەكتىلەردى قارجىلاندىرۋ قوسىمشا پىسىقتالۋدا — وسى ماسەلەنى شەشۋدى جەدەلدەتۋ ءۇشىن بەيىندى ۆەدومستۆولارعا ءتيىستى تاپسىرما بەرىلدى. دەنساۋلىق ساقتاۋ مينيسترلىگىنىڭ الدىنا وبەكتىلەرگە ولار اياقتالعانعا دەيىن تۇراقتى تۇردە بارىپ، قۇرىلىس بارىسىنا مونيتورينگ جۇرگىزۋ مىندەتى قويىلدى.