قازاقستاننىڭ 7 وبلىسىنداعى شەكارالاس اۋدانداردا حالىق سانى ازايىپ بارادى، دەپ حابارلايدى Almaty-akshamy.kz.
«سوڭعى 3 جىلدا قازاقستاننىڭ شەكارالاس اۋداندارىنىڭ حالقى 3،35-تەن 3،36 ملن ادامعا دەيىن ءوستى. بۇل رەتتە شەكارا ماڭىنداعى 65 اۋداننىڭ 40-دا حالىق سانىنىڭ ازايۋى بايقالادى. بۇل كوشى-قون اعىنىمەن جانە حالىقتىڭ تابيعي كەمۋىنە بايلانىستى بولىپ وتىر. حالىق نەگىزىنەن اقتوبە، الماتى، اتىراۋ، شىعىس قازاقستان، اباي، قوستاناي جانە سولتۇستىك قازاقستان وبلىستارىنىڭ شەكارالاس اۋداندارىندا ازايىپ بارادى»، - دەلىنگەن اشىق نقا پورتالىندا جاريالانعان اۋىلدىق اۋماقتارىن دامىتۋدىڭ 2023-2027 جىلدارعا ارنالعان تۇجىرىمداماسىندا، دەپ جازادى قازاقپارات .
حالىقتىڭ ۇدەرە كوشۋىنە باستى سەبەپ – تابىستىڭ تومەندىگى، جۇمىسسىزدىق، كولىك قولجەتىمدىلىگىنىڭ السىزدىگى جانە ينجەنەرلىك ينفراقۇرىلىمىنىڭ توزۋى.
«بىلتىر كوشى-قوننىڭ تەرىس سالدوسى شىعىس قازاقستان، تۇركىستان، سولتۇستىك قازاقستان جانە الماتى وبلىستارىندا بايقالادى. حالىقتىڭ تابيعي ازايۋى شىعىس قازاقستان، سولتۇستىك قازاقستان جانە پاۆلودار وبلىستارىنىڭ شەكارالاس اۋداندارىندا بايقالادى. تۇركىستان، الماتى جانە ماڭعىستاۋ وبلىستارىندا تابيعي ءوسىم بايقالادى. شەكارا ماڭىنداعى اۋماقتاردىڭ ەكونوميكاسى تابيعي-رەسۋرستىق جانە تۋريستىك-رەكرەاسيالىق الەۋەتتى جەتكىلىكسىز پايدالانۋمەن، قۇرىلىمىنىڭ مونوپروفيلدىلىگىمەن، شاعىن جانە ورتا كاسىپكەرلىك سۋبەكتىلەرىنىڭ ترانسشەكارالىق فاكتورلاردى پايدالانۋداعى ءالسىز بەلسەندىلىگىمەن سيپاتتالادى»، - دەپ كورسەتىلگەن قۇجاتتا.
سونىمەن قاتار، تۇجىرىمدامادا كورشى ەلدەرمەن سالىستىرعاندا شەكارا ماڭىنداعى ەلدى مەكەندەردىڭ الەۋمەتتىك-ەكونوميكالىق دامۋ كورسەتكىشتەرى الدەقايدا تومەن ەكەنى جازىلعان.