وڭىرلىك كوممۋنيكاسيالار قىزمەتى الاڭىندا قازاقستان شاحمات فەدەراسياسى وكىلدەرى، ازيا شاحمات فەدەراسياسىنىڭ باس حاتشىسى حيشام ال-تاحەر جانە ءۇندى شاحماتشىسى، شاحماتتان 2016 جىلعى ازيا چەمپيوناتىنىڭ جەڭىمپازى پاناياپپان سەتۋرماننىڭ قاتىسۋمەن باسپا ءسوز كونفەرەنسياسى ءوتتى.
بۇعان دەيىن حابارلانعانداي، بالۋان شولاق اتىنداعى سپورت سارايىندا وتكەن سالتاناتتى شارانى الماتى قالاسى اكىمىنىڭ ورىنباسارى ارمان قىرىقبايەۆ، قازاقستان شاحمات فەدەراسياسىنىڭ پرەزيدەنتى تيمۋر تۋرلوۆ جانە ازيا شاحمات فەدەراسياسىنىڭ باس حاتشىسى حيشام ال-تاحەر اشتى، دەپ حابارلايدى Almaty-akshamy.kz.
تيمۋر تۋرلوۆ مەملەكەت باسشىسىنىڭ قولداۋىنىڭ ارقاسىندا قازاقستان 2023 جىلى شاحماتتىڭ الەمدىك ورتالىعىنا اينالعانىن اتاپ ءوتتى.
«حالىقارالىق جارىستاردى وتكىزۋ تاجىريبەسى ءبىزدىڭ شاحمات فەدەراسياسىنىڭ جۇمىسىن كۇشەيتۋگە، ەلىمىزدە شاحماتتى دامىتۋعا كوپ جۇمىس جاساۋعا كومەكتەسەدى، وسىلايشا بولاشاقتا بۇدان دا كوپ چەمپيوندار، مىقتى شاحماتشىلار شىعادى»، - دەدى ول.
RAI پرەزيدەنتى شاحماتتان قۇرلىقتىق ازيا چەمپيوناتىندا كورەرمەندەردى قىزىقتى ينتەللەكتۋالدى ويىندار كۇتىپ تۇرعانىن جانە تۋرنير قازاقستاندىق بالالاردى وسى تاماشا ويىندى بەلسەندى ۇيرەنۋگە شابىتتاندىراتىنىنا سەنىم ءبىلدىردى.
ءوز كەزەگىندە حيشام ال-تاحەر قازاقستان پرەزيدەنتى قاسىم-جومارت توقايەۆقا ەلدە شاحمات سپورتىنىڭ دامۋىنا كورسەتكەن قولداۋى ءۇشىن، الماتى اكىمى ەربولات دوسايەۆ پەگ تيمۋر تۋرلوۆقا چەمپيوناتتى وسىنداي جوعارى دەڭگەيدە ۇيىمداستىرعاندارى ءۇشىن العىس ءبىلدىردى.
اشىلۋ سالتاناتىنان كەيىن ءبىرىنشى تۋر ءوتتى، ونىڭ ناتيجەسى بويىنشا Open-چەمپيوناتتا قازاقستاندىق گروسسمەيستەر رينات جۇمابايەۆ قارسىلاسىنا ەشقانداي مۇمكىندىك قالدىرماي، سەنىمدى جەڭىسكە جەتتى. ءوز جۇپتارىمەن وتكەن ويىندا مۇرتاس قاجعالەيەۆ، دەنيس ماحنيەۆ، نوگەربەك قازبەك جانە باسقالارى جەڭىسكە جەتتى. شەتەلدىك ويىنشىلار اراسىنان ەرەكشە تارتىستى ويىن پارتيالارى پاناياپپان سەترۋمان (ءۇندىستان)، شامسۋتدين ۆاحيدوۆ (وزبەكستان) جانە يراندىق دانەشۆار بارديا اراسىندا بولدى.
ايەلدەر چەمپيوناتىنىڭ ءبىرىنشى كەزەڭىنىڭ قورىتىندىسى بويىنشا قازاقستان شاحماتشىلارى – ارناش باۋىرجان، ليا قۇرمانعادييەۆا، ءامينا قايىربەكوۆا جەڭىس تۇعىرىنان كورىندى.
ەسكە سالايىق، شاحماتتان ەرلەر اراسىنداعى اشىق بىرىنشىلىك پەن ايەلدەر اراسىنداعى چەمپيوناتتى قامتيتىن قۇرلىقتىق ازيا چەمپيوناتى شۆەيساريا جۇيەسى بويىنشا، فيدە ەرەجەسىنە سايكەس 9 تۋردان تۇرادى. وعان ازيانىڭ 18 ەلىنەن 128 مىقتى ويىنشى قاتىسۋدا. جارىس 2023 جىلدىڭ 12 ماۋسىمىنا دەيىن جالعاسادى. شارانىڭ جۇلدە قورى 100 000 اقش دوللارىن قۇرايدى.
اشىق چەمپيوناتتىڭ ءتورت جەڭىمپازى جانە ايەلدەر چەمپيوناتىنىڭ ەكى جەڭىمپازى بيىلعى جىلدىڭ 29 شىلدەسى مەن 25 تامىزى ارالىعىندا باكۋدە وتەتىن فيدە–2023 الەم چەمپيوناتىنا قاتىسۋ قۇقىعىنا يە بولادى. الەم كۋبوگىنىڭ جەڭىمپازدارى شاحمات الەمىندەگى ەڭ جوعارى اتاق – شاحماتتان الەم چەمپيونى اتاعى ءۇشىن تالاسادى.
شاحماتتان ازيا قۇرلىقتىق چەمپيوناتىن ۇيىمداستىرۋشىلار – قازاقستان رەسپۋبليكاسى مادەنيەت جانە سپورت مينيسترلىگى، ازيا شاحمات فەدەراسياسى، الماتى قالاسى اكىمدىگىنىڭ قولداۋىمەن قازاقستان شاحمات فەدەراسياسى. ءتۋرنيردىڭ باس سەرىكتەسى – Freedom Holding Corp.