تۇراربەك تولەندييەۆ، قازاقستان رەسپۋبليكاسىنىڭ ەڭبەك سىڭىرگەن دارىگەرى:
قانداي مەملەكەت بولسىن، ونىڭ حالقىنىڭ دەنساۋلىعى دا سول ەلدىڭ ەكونوميكالىق-الەۋمەتتىك دامۋىنىڭ كورسەتكىشى بولادى. ەندەشە، «ءبىرىنشى بايلىق – دەنساۋلىق» دەگەن ءسوز بەكەر ايتىلماسا كەرەك.
بىزدە كەيىنگى جىلدارى مەديسينا سالاسىندا قانشاما ءىرى رەفورمالار جاسالدى. مىسالى، دەنساۋلىق ساقتاۋ كودەكسى، الەۋمەتتىك ساقتاندىرۋ باعدارلاماسى قابىلداندى. ءبىراق وڭدى ءبىر وزگەرىس بولا قويعان جوق. پرەزيدەنتىمىز قاسىم-جومارت كەمەل ۇلى توقايەۆ كەشەگى جولداۋىندا وسى دەنساۋلىق سالاسىنىڭ قارجىلاندىرىلۋىن سىنعا العانى بەكەر ەمەس.
ەندى ەرىكتى مەديسينالىق قامسىزداندىرۋ جۇيەسى ەنگىزىلۋى مۇمكىن. شىن ويىمدى ايتار بولسام، بۇل جۇيە ايتارلىقتاي ءبىر وزگەرىس جاساي قويادى دەي المايمىن. حالىقتىڭ جاعدايى ءماز ەمەس. مەديسينادا، اسىرەسە، مامان كادرلار دايارلاۋدا ساپا تومەن. قازىرگى كۇنى ءجۇردىم-باردىم وقىپ شىققاندار جەتەرلىك. اۋرۋدىڭ ەمىن تاۋىپ، جازۋ بىلاي تۇرسىن، جىلى قاباق تانىتپايتىن دارىگەرلەر دە كۇندەلىكتى ومىردە كەزدەسىپ جاتادى. ءبىز دارىگەرلەردى دايارلاۋدا ولاردىڭ ساۋاتتى، بىلىكتى مامان بولىپ شىعۋىنا اسا كوڭىل ءبولۋىمىز كەرەك. سان ەمەس، ساپا قاجەت. سەبەبى، دارىگەردىڭ قولىندا ادامزاتتىڭ تاعدىرى تۇرادى. مەديسينالىق مەكەمەلەر ساپالى دا زاماناۋي تەحنيكالىق اسپاپتارمەن قامتاماسىز ەتىلۋى دە ماڭىزدى. ناۋقاستاردى ارى-بەرى ساندالتۋدى قويۋ كەرەك. شالعاي ەلدىمەكەندەردە اۋرۋى اسقىنعان، ءبىراق قالاعا جەتۋگە قاراجاتى جوق اعايىن قانشاما! ءتىسى تۇسكەن، ونكولوگيالىق جانە تاعى باسقا دا اۋىر سىرقاتقا شالدىققان ەل-جۇرتتىڭ جايى مەنى دە الاڭداتادى. اۋىل حالقىنىڭ دەنساۋلىعىنا اسا كوڭىل ءبولۋدى پرەزيدەنت وتە دۇرىس ايتتى. مەملەكەت باسشىسى ءار اۋداندا كلينيكالىق اۋرۋحانالار سالىپ، جابدىقتاۋدى، ولاردى بىلىكتى ماماندارمەن قامتاماسىز ەتۋدى تەز ارادا قولعا الۋدى تاپسىرۋى وتە قۇپتارلىق. مەديسينالىق جوعارى وقۋ ورىندارىنىڭ جانىنان كوپبەيىندى اۋرۋحانالار جانە كلينيكالار اشىلادى دەدى. الداعى ءۇش جىلدا رەزيدەنتۋراعا بولىنەتىن گرانت سانى 70 پايىزعا كوبەيمەك. بۇل قادامدار دەنساۋلىق سالاسىنا جاڭا لەپ اكەلەدى دەپ سەنگىم كەلەدى.
«ۇلتتىق قور – بالالارعا» اتتى مۇلدەم جاڭا باعدارلاما اشىلادى دەدى. ەلەڭ ەتتىم. اتى، زاتى وزگەشە ەكەن. ودان دا جاقسىلىق كۇتەمىن. سەبەبى، جاڭا قازاقستاندى جاسايتىن سول ۇرپاق.
قازىرگى كۇنى باعانىڭ ءوسۋى، ازىق-تۇلىكتىڭ تاپشىلىعى، جەمقورلىق، ىشكى، سىرتقى ساياساتتاعى بەيمازا احۋال كوپتىڭ كوڭىلىنە الاڭ تۋعىزىپ جۇرگەنى جاسىرىن ەمەس. پرەزيدەنتىمىزدىڭ «ەلىمىزگە بولسىن» دەگەن ادال نيەتىنە، جاسامپاز قادامدارىنا كەدەرگى كەلتىرىپ، كۇيە جاققىسى كەلەتىن كەيبىر توپتاردىڭ ارەكەتتەرىن اقىماقتىق دەپ ويلايمىن. قانشاما جۇمىس ىستەلىپ جاتسا دا، كورگىمىز كەلمەيدى. مەملەكەت باسشىسى ەشقاشان ماڭگىلىك پرەزيدەنت بولمايتىنىن باسا ايتىپ، جەتى جىل مەرزىمگە عانا سايلانعانىن دۇرىس دەدى. كەلىسەمىن. مەملەكەت باسىندا وتىرعان كىم-كىم دە جەتى جىل ىشىندە ەلگە لايىقتى پرەزيدەنت، ياعني ءىزباسارىن تاربيەلەپ، دايىنداپ، حالىققا ۇسىناتىن دا شىعار. ونى الداعى ۋاقىتتا كورە جاتارمىز. ال ءقازىر جولداۋدا ايتىلعان قاداۋ-قاداۋ تاپسىرمالاردىڭ جۇزەگە اسۋىنا جالعىز پرەزيدەنت ەمەس، ءبىز دە، حالىق، قوعام بولىپ اتسالىسۋىمىز كەرەك دەپ ويلايمىن. ىسكە ساتتىلىك تىلەيمىن، ەل امان، جۇرت تىنىش بولسىن!