«اۋىلدا دەنساۋلىق ساقتاۋدى جاڭعىرتۋ» ۇلتتىق جوباسىن ىسكە اسىرۋ باستالدى

ءۇش جىل ىشىندە 655 دەنساۋلىق ساقتاۋ وبەكتىسىن سالۋ جانە 32 اۋدانارالىق اۋرۋحانانى جاڭعىرتۋ جوسپارلانعان.

بۇل تۋرالى ماجىلىستە «2024 – 2026 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىن تانىستىرۋ كەزىندە قارجى ۆيسە-مينيسترى ابزال بەيسەنبەك ۇلى ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«بيىل «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسىن ىسكە اسىرۋ باستالدى. بەكىتىلگەن ۇلتتىق جوباعا سايكەس، 2023-2025 جىلدارى 655 دەنساۋلىق ساقتاۋ وبەكتىسىن سالۋ جانە 32 اۋدانارالىق اۋرۋحانانى جاڭعىرتۋ جوسپارلانعان. بۇل 4 ملن-نان استام اۋىل تۇرعىندارىن مامانداندىرىلعان مەديسينالىق كومەكپەن قامتۋعا مۇمكىندىك بەرەدى. جوبانى ىسكە اسىرۋعا 2024 جىلعا ارنالعان بيۋدجەت جوباسىندا قۇجاتتامانىڭ ازىرلىگىن ەسكەرە وتىرىپ، 35،1 ملرد تەڭگە قاراستىرىلعان»، - دەدى ا. بەيسەنبەك ۇلى.

ونىڭ ايتۋىنشا، حالىق سانىنىڭ ۇلعايۋىن ەسكەرە وتىرىپ، تەگىن مەديسينالىق كومەكتىڭ كەپىلدەندىرىلگەن كولەمى جانە مىندەتتى الەۋمەتتىك مەديسينالىق ساقتاندىرۋ جۇيەسى اياسىندا شىعىستار 2،2 ترلن تەڭگەنى قۇرادى.

بۇدان بولەك ۆيسە-مينيستر 2024 جىلى رەسپۋبليكالىق بيۋدجەتتىڭ سپورت، تۋريزم جانە مادەنيەت سالالارىن دامىتۋعا ارنالعان شىعىستارى 298 ملرد تەڭگە كولەمىندە جوسپارلانعانىن ايتتى. ونىڭ ىشىندە جوعارى جەتىستىكتەرگە نەگىزدەلگەن سپورتتى دامىتۋعا، مادەنيەت جانە ارحيۆ ءىسى ۇيىمدارىنىڭ جۇمىستارىن قامتاماسىز ەتۋگە، مادەنيەت، ونەر ءارى سپورت سالالارىندا دارىندى بالالاردى وقىتۋعا جانە تاربيەلەۋگە، تۋريزم مەن تۋريستىك قىزمەتتى دامىتۋعا، سونداي-اق دۇنيەجۇزىلىك كوشپەندىلەر ويىندارىن وتكىزۋگە باعىتتالعان.