ەل اۋماعىندا قاتىناپ جۇرگەن 654 ۆاگوننىڭ (32%) قولدانۋ مەرزىمى 20 جىل جانە ودان جوعارى.
بۇل تۋرالى «جولاۋشىلار تاسىمالى» اق باس ديرەكتورى جانىبەك تايجانوۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بۇگىندە بىزدە قولدانىستا 2098 ۆاگون بار. ءبىزدىڭ ەسكى ۆاگوندارعا ءجيى-جيى سىن ايتىلادى، ءبىز ونى قابىلدايمىز. قاتىناپ جۇرگەن 654 ۆاگوننىڭ (32%) قولدانۋ مەرزىمى 20 جىل جانە ودان جوعارى. بۇل - ەسكى ۆاگوندار. وتكەن جىلى 256 ەسكى ۆاگوندى ىستەن شىعاردىق. سوڭعى 10 جىلدا «جولاۋشىلار تاسىمالى» اق پاركى 50%-عا جاڭارتىلدى. قاۋىپسىزدىك، جايلىلىق جانە ەكولوگيا تالاپتارىنا سايكەس زاماناۋي حالىقارالىق تالاپتارعا جاۋاپ بەرەتىن 1200-دەن استام ۆاگون ساتىپ الىندى»، - دەدى جانىبەك تايجانوۆ.
سونداي-اق، سپيكەر ۇكىمەتتىڭ قولداۋىمەن جىل سايىن پويىز ۆاگوندارى جاڭارتىلىپ جاتقانىن ايتتى.
«ءقازىر 654 ەسكى ۆاگون بار. ولار ءار باعىتتا قاتىنايدى. قالعان ۆاگوندار بويىنشا 52% - بۇل شامامەن 1100 ۆاگون 11 جىلعا دەيىن قولدانىلىپ كەلە جاتىر. قالعان بولىگىنىڭ پايدالانىلعان مەرزىمى - 11-20 ارالىعىندا»، - دەيدى ول.
ونىڭ ايتۋىنشا، ىستەن شىققان ۆاگونداردىڭ پايدالانۋ مەرزىمى 40 جىل جانە ودان دا كوپ بولعان.