قازاقستاننىڭ باس دارىگەرى اۋىل تۇرعىندارىندا ءجيى كەزدەسەتىن اۋرۋلاردى اتادى
قازاقستاننىڭ دەنساۋلىق ساقتاۋ ءمينيسترى اجار عينيات اۋىلدىق ەلدى مەكەندەردەگى دەنساۋلىق ساقتاۋ كورسەتكىشتەرى تۋرالى باياندادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بۇگىندە اۋىلدا شامامەن 8 ملن ادام تۇرادى، بۇل ەل حالقىنىڭ 41%-ىن قۇرايدى. اۋىل تۇرعىندارىنا 5 مىڭنان استام مەديسينالىق ۇيىم مەديسينالىق كومەك كورسەتەدى. جالپى مەديسينالىق-دەموگرافيالىق جاعداي ەلىمىزدە تۇراقتى. رەسمي ستاتيستيكا بويىنشا، حالىقتىڭ دەنساۋلىعى جاقسارىپ، ءولىم-جىتىم سوڭعى 9 ايدا 28،5%-عا تومەندەدى»، - دەدى مينيستر ۇكىمەتتىڭ بۇگىنگى وتىرىسىندا.
ونىڭ ايتۋىنشا، اۋىل حالقىنىڭ دەنساۋلىعىن تالداۋ ولاردىڭ ءبىرىنشى (42،7%) تىنىس الۋ اعزالارىنىڭ اۋرۋلارىنان زارداپ شەگەتىنىن كورسەتەدى، ەكىنشى ورىندا اس قورىتۋ، ءۇشىنشى ورىندا – نەسەپ-جىنىس جۇيەسى اۋرۋلارى ورىن العان.
«شالعاي اۋىل تۇرعىندارىنا مەديسينالىق قىزمەتتەردىڭ قولجەتىمدىلىگىن قامتاماسىز ەتۋ ماقساتىندا كولىك مەديسيناسى دامىعان. مەديسينالىق كومەك جانە كونسۋلتاسيالىق-دياگنوستيكالىق قىزمەتتەر كورسەتەتىن 149 جىلجىمالى مەديسينالىق كەشەن جۇمىس ىستەيدى. بيىل ەلىمىزدىڭ 10 وڭىرىندە 64 مىڭ تۇرعىنعا مەديسينالىق كومەك كورسەتكەن «جاردەم» جانە «سالاماتتى قازاقستان» مەديسينالىق پويىزدارى قايتادان ىسكە قوسىلدى»، - دەدى اجار عينيات.
سونىمەن بىرگە، مەديسينالىق اۆياسيانى اۋىل تۇرعىندارىن تاسىمالدايتىن جانە شۇعىل كومەك كورسەتەتىن 33 اۋە كەمەسى جۇرگىزەدى. اۋىلدا جەدەل مەديسينالىق كومەك كورسەتۋ ءۇشىن 595 بريگادا جۇمىس ىستەيدى جانە 2 ملن شاقىرتۋعا قىزمەت كورسەتىلگەن.