تاراپتار ىسكە اسىراتىن جوبالاردى تالقىلادى.
ق ر اۋىل شارۋاشىلىعى ءمينيسترى ەربول قاراشوكەيەۆ ەۋروپا مەن ورتالىق ازياداعى ورنىقتى دامۋ جونىندەگى وڭىرلىك ديرەكتور ستيۆەن شونبەرگەرمەن، دۇنيەجۇزىلىك بانكتىڭ قازاقستانداعى تۇراقتى وكىلى جان-فرانسۋا مارتومەن كەزدەستى، دەپ حابارلايدى Almaty-akshamy.kz قازاقپارات-قا سىلتەمە جاساپ.
مينيسترلىك مالىمەتىنشە، تاراپتار اۋىل شارۋاشىلىعى جوبالارىن ىسكە اسىرۋداعى ىنتىماقتاستىقتىڭ قازىرگى جاعدايى مەن كەلەشەگىن تالقىلادى. دۇنيەجۇزىلىك بانك وكىلدەرى ق ر اۋىل شارۋاشىلىعى مينيسترلىگى قابىلداپ جاتقان ءىس-شارالارعا جوعارى باعا بەردى. اتاپ ايتقاندا، سالانى سۋبسيديالاۋ، قارجىلاندىرۋ، ۆەتەرينارلىق قىزمەتتەردى جەتىلدىرۋ، جايىلىمدىق جەرلەردى باسقارۋ، مال شارۋاشىلىعى سەكتورىنداعى پارنيكتىك گاز شىعارىندىلارى جۇيەسىن جەتىلدىرۋ، ۇساق فەرمەرلەرگە قىزمەت كورسەتەتىن ينستيتۋتتاردى نىعايتۋ سياقتى باسىم باعىتتار باعالاندى. ەربول قاراشوكەيەۆ اۋىل شارۋاشىلىعى مينيسترلىگى ۆەتەرينارلىق قىزمەت كورسەتۋ مەن جانۋارلاردى ەسەپكە الۋ جۇيەسىن جەتىلدىرۋ، فەرمەرلىك مودەلدەردى ىلگەرىلەتۋ، ەت يندۋسترياسى ءۇشىن ءتيىمدى اگروەكولوگيالىق ساياساتتى ىسكە اسىرۋ سالالارىنا كۇش سالاتىنىن ايتتى.