ەۋرووداق قازاقستانداعى كليماتتىڭ وزگەرۋىنە قارسى كۇرەستىڭ يننوۆاسيالىق شەشىمدەرىن قولدايدى.
بۇگىن ەلىمىزدەگى 70-كە جۋىق اقپاراتتىق تەحنولوگيالار سالاسىنىڭ ستۋدەنتتەرى مەن ماماندارى كليماتتىق ماسەلەلەردى ازايتۋ ماقساتىمەن ەڭ ۇزدىك تازا تەحنولوگيالىق شەشىم تابۋ ءۇشىن الماتىداعى EU Ecohackathon بايقاۋىنا قاتىستى، دەپ حابارلايدى Almaty-akshamy.kz.
ءىس-شارانى ەۋروپالىق وداقتىڭ قازاقستانداعى وكىلدىگى ەۋرووداق كليماتتىق ديپلوماتياسى جانە ەۋرووداق پەن قازاقستاننىڭ ءبىلىم، عىلىم، زەرتتەۋلەر جانە يننوۆاسيالار سالاسىنداعى ىنتىماقتاستىعى شەڭبەرىندە ۇيىمداستىردى. 48 ساعات ىشىندە حاكاتون قاتىسۋشىلارى وزدەرىنىڭ يننوۆاسيالىق يدەيالارى مەن جوبالارىن كەلەسى سالالاردا ۇسىندى: يننوۆاسيالار، سيفرلاندىرۋ، جوعارى تەحنولوگيالار، جاسىل تەحنولوگيالار، جاسىل قارجى، تازا تەحنولوگيالار، 4ء-شى ونەركاسىپتىك ريەۆوليۋسيا، كليماتتىڭ وزگەرۋى، جاڭا سالالار، تۇراقتى دامۋ.
«ءبىزدىڭ حاكاتونىمىزدىڭ ماقساتى – قازاقستانداعى جاسىل جانە تۇراقتى دامۋ بويىنشا جاڭا يننوۆاسيالىق يدەيالار مەن جوبالاردىڭ دامۋىنا سەبەپتەسۋ. وسى ەكى كۇن ىشىندە حاكاتون قاتىسۋشىلارى قۇندى تاجىريبە جيناپ، بىلىكتىلىگىن دامىتتى دەگەن ۇمىتتەمىز. بۇل ولاردىڭ بولاشاقتا ءوزىنىڭ ستارتاپتارىن قۇرىپ، الەمدى جاقسارتۋعا مۇمكىندىك اشادى دەپ ويلايمىز»، - دەدى ەۋروپالىق وداقتىڭ قازاقستانداعى ەلشىسى كەستۋتيس يانكاۋسكاس.
ەكوحاكاتونعا بارلىعى 12 جوبا ۇسىنىلدى. قازىلار القاسى ۇزدىك ءۇش توپتى تاڭدادى:
Farmer توبى. جوبا تاماق قالدىقتارىن تابيعي تىڭايتقىشقا وڭدەۋمەن بايلانىستى. قاتىسۋشىلار وزدەرىنىڭ يدەيالارىن ءتيىمدى ىسكە اسىرۋدىڭ ءۇش كەزەڭىن كورسەتتى: تاماق قوقىستارىن جيناۋ، تاماق قوقىستارىن تىڭايتقىش پەن كونسەنتراتقا قايتا وڭدەۋ، سودان كەيىن تىڭايتقىشتى ساتۋ جانە تاماق قوقىستارىن جيناۋ قىزمەتىن ۇسىنۋ.
Lilo توبى. بۇل ءموبيلدى ەكو قوسىمشاسى، ول جەكە تاپسىرمالاردى كۇنتىزبە رەتىندە اياقتاۋعا كومەكتەسەدى، ال Lio كومانداسى جەكە ماقساتتارىڭىزعا جەتكەن سايىن ءبىر اعاشتى وتىرعىزادى. جوبا جازىلىم بويىنشا جۇمىس ىستەيدى، ال اعاشتار قوسىمشاداعى جارناما ارقىلى ساتىپ الىنادى.
Eco menu توبى. جوبا مەكەمەلەردە قاعاز مازىرلەر مەن چەكتەردى ازايتۋعا باعىتتالعان. Ecomenu - بۇل رەستوراتورلار ءمازىردى ەلەكتروندى فورماتتا جۇكتەي الاتىن پلاتفورما، ال كەلۋشىلەر ونى تەلەفوننىڭ كامەراسىن QR كودىنا باعىتتاۋ ارقىلى كورەدى.
وسى كۇزدە جەڭىمپازدار ەستونياعا IT جانە ستارتاپ يندۋسترياسىنداعى ەۋروپالىق تاجىريبەنى زەرتتەۋ ءۇشىن تانىسۋ ساپارىمەن بارادى.
«ەستونيا - ەۋروپا مەن الەمدەگى ەڭ سيفرلاندىرىلعان ەلدەردىڭ ءبىرى. مەن جەڭىمپازداردىڭ ەستونيانىڭ ستارتاپتار قاۋىمداستىعىمەن كەزدەسەتىنىنە قۋانىشتىمىن. IT سالاسى وزگەرىستەردىڭ ۇلى جولسەرىگى، حاكاتون بارىسىندا ازىرلەنگەن ۇزدىك شەشىمدەر ىسكە اساتىنىنا سەنەمىن»، - دەدى ەستونيانىڭ قازاقستانداعى ەلشىسى تووماس تيرس.
حاكاتون بارىسىندا قاتىسۋشىلار تەحنيكالىق، سالالىق جانە بيزنەس-ساراپشىلاردىڭ كومەگىن الىپ، ستارتاپتاردىڭ تابىستى نەگىزىن قالاۋشىلاردىڭ تاجىريبەسىن زەردەلەپ، قالدىقتاردى قايتا وڭدەۋ جانە كادەگە جاراتۋ بويىنشا ترەنينگتەن ءوتتى.
حاكاتوننىڭ سەرىكتەسى جانە MOST بيزنەس-ينكۋباتورىنىڭ باس ديرەكتورى اليم حاميتوۆ بۇل ءىس-شارا قالا مەن جەرگىلىكتى ستارتاپتار ەكوجۇيەسى ءۇشىن جارقىن وقيعا بولعانىن اتاپ ءوتتى.
«پاندەميا باستالعاننان قالادا مۇنداي اۋقىمدى ءىس-شارالار وتكىزىلمەدى. ەۋرووداق باستاماسىنىڭ ارقاسىندا ءبىز دارىندى جاستارعا سەرپىن بەرە الدىق. قاتىسۋشىلار يدەيادان پروتوتيپكە دەيىن جەتتى جانە قازىلار القاسىنا جۇمىس ىستەيتىن شەشىمدەرىن ۇسىندى. ستۋدەنتتەر تالىمگەرلەر مەن بايانداماشىلاردان پراكتيكالىق ءبىلىم الدى، ال جەڭىمپازدار ساپاردان جاڭا بىلىممەن ورالادى دەپ ۇمىتتەنەمىن»، - دەدى ا.حاميتوۆ.
بارلىق قاتىسۋشىلارعا العىس سەرتيفيكاتتار بەرىلدى. سونىمەن قاتار، ەۋرووداق وكىلدىگى مەن ەۋرووداق ەلدەرىنىڭ قازاقستانداعى ەلشىلىكتەرى جەڭىمپازدارعا باعالى سىيلىقتار تابىستادى.
«ۇزدىك يدەيا» نوميناسياسىن قايتا وڭدەلگەن پلاستيكتەن جاسالعان كيىم برەندى Piper ۇتىپ الدى، «يننوۆاسيالىق شەشىم» نوميناسياسى ەكولوگيالىق تازا تاۋارلار ماركەتپلەيسى بار Zhasyl توبىنا بەرىلدى جانە «ءتيىمدى ماركەتينگتىك ستراتەگيا» نوميناسياسىن بالالارعا ارنالعان تەگىن Eco Challenge ونلاين ەكولوگيا كۋرستارىنىڭ توبى جەڭىپ الدى.
ءىس-شارادا Keremet Art گالەرەياسىنىڭ ۇيىمداستىرۋىمەن قازاقستاندىق سۋرەتشى الپامىس باتىروۆتىڭ سيفرلاندىرىلعان ارت-پەرفورمانسى ۇسىنىلدى.
EU EcoHackathon ەستونيانىڭ قازاقستانداعى ەلشىلىگىنىڭ، حالىقارالىق IT ۋنيۆەرسيتەتىنىڭ (نۋرجان دۋزبايەۆ)، MOST، IBC Group (كۋرمەت اۋباكيروۆ)، Eco Network (اننا گۋدارزي) كومپانياسىنىڭ، كۋرمەت اۋباكىروۆتىڭ جەكە قورىنىڭ، الماتى قالاسى اكىمدىگىنىڭ جانە «اتامەكەن» ۇلتتىق كاسىپكەرلەر پالاتاسىنىڭ قولداۋىمەن ءوتتى.