ەكى ميلليارد ادامنىڭ ارتىق سالماعى.
الەم بويىنشا ءجۇز ميلليونعا جۋىق ادام جەتكىلىكتى تاماقتانبايدى نەمەسە سەمىزدىكپەن اۋىرادى. سول سەبەپتى ازىق-تۇلىكتى ءوندىرۋ مەن تۇتىنۋ ادىستەرىنە وزگەرىس ەنگىزۋ كەرەك. بۇل تۋرالى بۇۇ باس حاتشىسى انتونيۋ گۋتەرريش نيۋ-يوركتەگى بۇۇ-نىڭ شتاب-پاتەرىندە وتكەن باس اسسامبلەيانىڭ 76-شى سەسسياسى ايتتى، دەپ حابارلايدى Almaty-akshamy.kz قازاقپارات-قا سىلتەمە جاساپ.
«ءۇش ميلليارد ادام دۇرىس تاماقتانبايدى. ەكى ميلليارد ادامنىڭ ارتىق سالماعى بار نەمەسە سەمىزدىكپەن اۋىرادى. ال 462 ميلليون ادام اشتىقتا ءومىر سۇرۋدە»، - دەدى بۇۇ باسشىسى.
بۇۇ باسشىسى جاڭا ەكولوگيالىق ءقاۋىپسىز ازىق-تۇلىك جۇيەلەرىن قۇرۋ قاجەت دەپ سانايدى. انتونيۋ گۋتەرريش پەن ءسامميتتىڭ وزگە قاتىسۋشىلارى ازىق-تۇلىك جۇيەلەرىن قايتا قاراپ، ادامداردىڭ دەنساۋلىعىن جاقسارتۋ، ولاردىڭ ءال-اۋقاتىن كوتەرىپ، عالامشاردى ساۋىقتىرۋ ءۇشىن ءۇش نەگىزگى ماقسات قويۋدى ۇسىنىپ وتىر. ونىڭ ايتۋىنشا، ازىق-تۇلىك جۇيەلەرى بارلىق ادامنىڭ دەنساۋلىعى مەن ءال-اۋقاتىن نىعايتۋعا ىقپالداسۋى كەرەك جانە عالامشاردى قورعاۋى ءتيىس. وعان قوسا، جۇيەلەر تەك قانا بيزنەس پەن ۇلەسكەرلەردىڭ ءال-اۋقاتىن ەمەس، سونىمەن قاتار فەرمەرلەر مەن ازىق-تۇلىك ونەركاسىبىندە قىزمەت ەتەتىن جۇمىسشىلاردى قولداۋى كەرەك.