قاۋلىعا پرەمەر-مينيستر قول قويدى.
ۇكىمەت اۋىلدىق اۋماقتاردى دامىتۋدىڭ 2023-2027 جىلدارعا ارنالعان تۇجىرىمداماسىن بەكىتتى، دەپ حابارلايدى Almaty-akshamy.kz
تۇجىرىمداما اۋىلدىق اۋماقتاردىڭ گەوگرافيالىق ەرەكشەلىكتەرى مەن ارتىقشىلىقتارىن ەسكەرە وتىرىپ، ولاردىڭ الەۋمەتتىك-ەكونوميكالىق الەۋەتىن اشا تۇسۋگە باعىتتالعان. ونىڭ اياسىندا اۋىل تۇرعىندارىنىڭ تابىسى مەن تۇرمىس ساپاسىن ارتتىرۋ بويىنشا ءتۇرلى شارالار قاراستىرىلعان.
قاسىم-جومارت توقايەۆ 2022 جىلعى قاراشا ايىندا ق ر پرەزيدەنتى لاۋازىمىنا كىرىسكەننەن كەيىن وسى تۇجىرىمدامانى ازىرلەۋ تۋرالى جارلىققا قول قويدى.
قۇجاتتا «اۋىل – ەل بەسىگى» جوباسى اياسىندا رەسپۋبليكا بويىنشا اۋىل تۇرعىندارىنىڭ 90%-ى ءومىر ءسۇرىپ جاتقان دامۋ الەۋەتى جوعارى 3،5 مىڭ اۋىلدىق ەلدى مەكەندى (اەم) كەشەندى جاڭعىرتۋعا باسا نازار اۋدارىلعان. مۇنداي ەلدى مەكەندەر ادامداردىڭ ەڭبەك ەتىپ، ءومىر سۇرۋىنە قولايلى جاعدايلار جاساۋ ەسەبىنەن ەكونوميكالىق ءوسۋدىڭ جاڭا نۇكتەلەرىنە اينالادى.
نەگىزگى ماقساتتاردىڭ ءبىرى – اۋىلدىق ەلدى مەكەندەردەگى الەۋمەتتىك، ينجەنەرلىك جانە كولىك ينفراقۇرىلىمىن دامىتۋ. اتاپ ايتقاندا، جاڭا مەكتەپتەر مەن مەديسينالىق نىساندار سالىنىپ، سۋمەن جانە ەلەكترمەن ۇزدىكسىز جابدىقتالادى، كەڭ جولاقتى ينتەرنەت جانە عارىشتىق بايلانىسى تارتىلادى، اۋىل جولدارىنىڭ ساپاسى جاقسارىپ، كىتاپحانا، كلۋب، مۋزەي جانە كينوتەاتر، سپورت عيماراتتارى سياقتى مادەني نىساندار سالىنادى، حالىققا قىزمەت كورسەتۋ ورتالىقتارى اشىلادى.
تۇرعىن ءۇي قۇرىلىسىن جانداندىرۋ ءۇشىن جاڭا جەر ۋچاسكەلەرىنە ينجەنەرلىك كوممۋنيكاسيالاردى جۇرگىزۋ جۇمىستارى جالعاسادى. بۇل رەتتە اۋىلدىق ەلدى مەكەندەردە ءوز قىزمەتكەرلەرىنە ءۇي سالىپ بەرگەن جۇمىس بەرۋشىلەردىڭ شىعىندارى جالپى الاڭى 100 شارشى مەتردەن اسپايتىن ءۇي قۇنىنىڭ 50% مولشەرىندە سۋبسيديالاناتىن بولادى.
اۋىلدىق جەرلەردەگى قوعامدىق قاۋىپسىزدىكتى كۇشەيتۋ ءۇشىن زاماناۋي ۋچاسكەلىك پوليسيا پۋنكتتەرىن سالۋ، اۋدان ورتالىقتارىندا بەينەباقىلاۋ جۇيەسىن ەنگىزۋ، اۋىلداردا جاياۋ جۇرگىنشىلەر جولدارى مەن مال ايداۋ ايماقتارىن بەلگىلەۋ، شومىلۋعا رۇقسات ەتىلگەن جانە جابدىقتالعان ورىندار قۇرۋ بويىنشا جۇمىستار جۇرگىزىلەدى.
وعان قوسا شەكارالاس اۋىلدىق ەلدى مەكەندەردى دامىتۋعا ەرەكشە نازار اۋدارىلاتىن بولادى. اتاپ ايتقاندا، ينفراقۇرىلىمدى جاڭارتۋ مەن نەگىزگى قىزمەتتەردى قامتاماسىز ەتۋدىڭ ارقاسىندا حالىقتىڭ ەلدى مەكەندەردەن كوشۋىن ازايتۋ، ادامداردىڭ ءومىر سۇرۋىنە قولايلى جاعداي جاساۋ جانە جالپى شەكارا ماڭىنداعى اۋدانداردىڭ ەكونوميكالىق دامۋىنا جاڭا سەرپىن بەرۋ جوسپارلانىپ وتىر. ال ەڭبەك تاپشىلىعى بار وڭىرلەردىڭ شەكارالاس اۋىلدىق وكرۋگتەر تۇرعىندارىنىڭ جالاقىسىنا ۇستەمەاقى قوسۋ مۇمكىندىگى قارالادى.
سونىمەن قاتار تۇجىرىمداما اياسىندا توپىراق قۇنارىن جاقسارتۋ، اۋىل شارۋاشىلىعى جەرلەرىن ۇتىمدى پايدالانۋعا باقىلاۋدى كۇشەيتۋ، جاڭا سۋارمالى ۋچاسكەلەردى اينالىمعا ەنگىزۋ، سۋ قويمالارىن رەكونسترۋكسيالاۋ جانە سالۋ، ونىمدىلىكتى ارتتىرۋ، داقىلداردى ءارتاراپتاندىرۋ جانە ت.ب. بويىنشا جۇيەلى شارالار كوزدەلگەن.
اۋىل تۇرعىندارىنىڭ تابىسىن ارتتىرۋ ماسەلەسىن اگروونەركاسىپ ءوندىرىسىن جانداندىرۋ، كاسىپكەرلىكتى جانە اۋىل شارۋاشىلىعى كووپەراسياسىن دامىتۋ ارقىلى شەشۋ جوسپارلانىپ وتىر. وسىلايشا، شاعىن شارۋاشىلىقتاردى بىرىكتىرۋ جانە اۋىل شارۋاشىلىعى كووپەراتيۆتەرىن ۇيىمداستىرۋ فەرمەرلەرگە تۇقىم، تىڭايتقىش، جانار-جاعارماي ماتەريالدارى، جەم-شوپ، اگروتەحنيكالىق جانە ۆەتەريناريالىق قىزمەتتەر شىعىندارىن قىسقارتۋعا، جەر ۋچاسكەلەرىن، اۋىل شارۋاشىلىعى تەحنيكاسىن، يرريگاسيالىق جانە درەناجدىق جۇيەلەردى بىرلەسىپ پايدالانۋ ەسەبىنەن وندىرىلگەن ءونىم كولەمىن ارتتىرۋعا، سونداي-اق دەلدالدارسىز تۇراقتى تۇردە تاۋار وتكىزىپ وتىرۋعا مۇمكىندىك بەرەدى.