وتباسى-تۇرمىستىق قاتىناستار سالاسىندا قۇقىقبۇزۋشىلىقتار جاساعان ادامدارعا قاتىستى پروفيلاكتيكالىق ءىس-شارالاردىڭ نەگىزگىلەرىنىڭ ءبىرى – پروفيلاكتيكالىق ەسەپكە الۋ جانە جەكە پروفيلاكتيكالىق جۇمىستاردى جۇرگىزۋ.
2023 جىلدىڭ 3 ايىندا 2043 ادام پروفيلاكتيكالىق ەسەپكە الىندى، 1810 ادامعا قورعاۋ نۇسقاماسى شىعارىلدى، 233 قۇقىق بۇزۋشىعا ەرەكشە مىنەز-قۇلىق تالاپتارى بەلگىلەندى. 65 ادام ماجبۇرلەپ ەمدەۋگە جىبەرىلدى، دەپ حابارلايدى Almaty-akshamy.kz
«تالداۋ كورسەتكەندەي، وتباسى-تۇرمىستىق قاتىناستار سالاسىنداعى قۇقىقبۇزۋشىلىقتار مەن قىلمىستار وتباسىلىق جانجالداردان، تۇسىنىسپەۋشىلىكتەردەن، جۇبايىنىڭ جۇمىسسىزدىعىنان، الكوگولدى ىشىمدىك ىشۋىنەن، مۇلىكتى بولۋدەن، تۋىستارىنىڭ وتباسىلىق ومىرگە ارالاسۋىنان، قىزعانىشتان، سونداي-اق قيىندىقتاردى جەڭۋ داعدىلارى، اگرەسسورعا شامادان تىس تاۋەلدىلىك سالدارىنان تۋىندايدى. سونىمەن قاتار وتباسى-تۇرمىستىق قاتىناستار سالاسىنداعى زاڭسىز ارەكەتتەر جاسىرىن سيپاتقا يە، بۇل شىنايى كورىنىستى تولىعىمەن قۇرۋدى قيىنداتادى. پوليسيا قىزمەتكەرلەرى ءارتۇرلى مەنشىك نىسانىنداعى مەكەمەلەر مەن ۇيىمداردىڭ، وقۋ ورىندارىنىڭ ۇجىمدارىمەن كەزدەسۋلەر، سونداي-اق حالىقپەن جيىندار وتكىزىپ، وندا زاڭنامانى ءتۇسىندىرىپ، زورلىق-زومبىلىققا توزبەۋشىلىكپەن قاراۋ قاجەتتىلىگىن ايتۋدا. بۇل وڭ ناتيجە بەرىپ، زورلىق-زومبىلىقتىڭ كەز كەلگەن ءتۇرى ءۇشىن جاۋاپكەرشىلىكتىڭ بار ەكەنىن ەسكەرتەدى»، – دەدى الماتى قالالىق پد جپقب ايەلدەردى زورلىق-زومبىلىقتان قورعاۋ ءبولىمىنىڭ اعا ينسپەكتورى اقبوتا ءابىلقاسىموۆا.
سونداي-اق سپيكەر كريمينوگەندىك جاعدايدى جاقسارتۋ، وتباسى-تۇرمىستىق قاتىناستار سالاسىنداعى قۇقىق بۇزۋشىلىقتاردىڭ الدىن الۋ ماقساتىندا “تۇرمىس”، “وتباسىنداعى زورلىق-زومبىلىققا جول جوق”، “باقىتتى وتباسى”، “زورلىق-زومبىلىقسىز 16 كۇن” الدىن الۋ ءىس-شارالارى تۇراقتى نەگىزدە وتكىزىلىپ جاتقانىن اتاپ ءوتتى. ءازقب ينسپەكتورلارى قيىن ومىرلىك جاعدايعا تاپ بولعان ايەلدەر جۇگىنگەن كەزدە ولاردىڭ كونستيتۋسيالىق قۇقىقتارىن، بوستاندىقتارى مەن زاڭدى مۇددەلەرىن قورعاۋدى قامتاماسىز ەتۋ شارالارىن قولدانادى. جىل باسىنان بەرى الماتىداعى داعدارىس ورتالىقتارىنا ۇكىمەتتىك ەمەس ۇيىمداردىڭ كومەگىمەن 170 ايەل جىبەرىلگەن.