اۋىل مەكتەپتەرىنىڭ وقۋشىلارى اراسىندا جاراتىلىستانۋ-ماتەماتيكالىق باعىت بويىنشا وتكەن II رەسپۋبليكالىق وليمپيادانىڭ قورىتىندىسى شىعارىلدى.
قورىتىندى كەزەڭگە 486 وقۋشى قاتىسىپ، ونىڭ ىشىندە 221 وقۋشى جەڭىمپاز اتاندى. بۇل بالالار – ەلىمىزدىڭ ەڭ شالعاي ايماقتارىنان كەلگەن دارىندى جاستار، دەپ حابارلايدى aqshamnews.kz وقۋ-اعارتۋ مينيسترلىگىنە سىلتەمە جاساپ.
ماراپاتتاۋ راسىمىنە ورتا ءبىلىم بەرۋ كوميتەتىنىڭ ءتوراعاسى قانىبەك جۇماش ۇلى بەكبولاتوۆ قاتىستى.
«وقۋ-اعارتۋ مينيسترلىگى اۋىل مەكتەپتەرىنىڭ تالانتتى جانە بىلىمگە قۇشتار وقۋشىلارىن انىقتاۋ ماقساتىندا رەسپۋبليكالىق وليمپيادا ەكىنشى جىل قاتارىنان وتكىزۋدە. ەگەر بىلتىر وليمپيادانىڭ ءبىرىنشى كەزەڭىنە 78 مىڭ وقۋشى قاتىسسا، بيىل ولاردىڭ سانى 113 مىڭنان استى. بۇل اۋىل وقۋشىلارىنىڭ زياتكەرلىك جارىستارعا دەگەن قىزىعۋشىلىعىنىڭ ارتىپ، رەسپۋبليكالىق وليمپيادانىڭ مارتەبەسىنىڭ جوعارى ەكەنىن كورسەتەدى. بارشاڭىزدى جەتىستىكتەرىڭىزبەن قۇتتىقتايمىن جانە ءبىلىم جولىندا جاڭا تابىستار تىلەيمىن!» – دەدى كوميتەت ءتوراعاسى.
«وليمپيادانىڭ ەڭ جاس قاتىسۋشىسى» نوميناسياسى بويىنشا ديپلومدارمەن پاۆلودار وبلىسىنان يمران قۇسايىنوۆ جانە قىزىلوردا وبلىسىنان تورە بالتابايەۆ ماراپاتتالدى.
«مەن 6-سىنىپتا وقيمىن، ءبىراق وليمپياداعا 9-سىنىپ باعدارلاماسى بويىنشا قاتىسامىن. ءبىزدىڭ ەلدە ءبىلىم الىپ، عىلىممەن اينالىسۋعا كوپتەگەن مۇمكىندىكتەر بار ەكەنىن ماقتان تۇتامىن. مەملەكەتىمىز تالانتتى بالالاردى قولداۋعا ەرەكشە كوڭىل بولەدى. ءبىز ءۇشىن وليمپيادالار، بايقاۋلار ۇيىمداستىرىلادى، ال ۇزدىكتەر حالىقارالىق جارىستارعا جىبەرىلەدى. مەن دە وليمپيادالىق رەزەرۆتىڭ ءبىر بولىگى بولۋدى، ءبىلىمىمدى جەتىلدىرىپ، ءبىر كۇنى ەلىم ءۇشىن التىن مەدال ۇتىپ الۋدى ارماندايمىن!» – دەپ ءبولىستى تورە بالتابايەۆ.
وليمپيادادا بارلىعى 221 مەدال ساراپقا سالىندى: 117 قولا، 62 كۇمىس جانە 42 التىن مەدال.
اۋىل مەكتەپتەرىنىڭ وقۋشىلارىنا ارنالعان رەسپۋبليكالىق وليمپيادا 13 ءپان بويىنشا جاراتىلىستانۋ-ماتەماتيكالىق جانە قوعامدىق-گۋمانيتارلىق باعىتتاردا ءۇش كەزەڭدە وتەدى. مەكتەپ كەزەڭىنە 99 264 وقۋشى قاتىسىپ، ولاردىڭ 53 593ء-ى اۋداندىق كەزەڭگە ءوتتى. وبلىستىق كەزەڭدە 12 000 وقۋشى ب ا ق سىنادى، ال فينالعا 1000-عا جۋىق وقۋشى شىقتى. سونىڭ ىشىندە 486 وقۋشى جاراتىلىستانۋ-ماتەماتيكالىق باعىتتاعى وليمپياداعا قاتىستى، ال 450 وقۋشى قوعامدىق-گۋمانيتارلىق باعىت بويىنشا وليمپياداعا قاتىسادى. بۇل وليمپيادا 10-14 جەلتوقسان ارالىعىندا استانا قالاسىندا وتەدى.
«ۇزدىك وليمپيادالىق كوماندا» نوميناسياسى بويىنشا I دارەجەلى ديپلومدار قىزىلوردا، تۇركىستان جانە ماڭعىستاۋ وبلىستارىنىڭ قۇراما كوماندالارىنا تابىستالدى.
جەڭىمپازدارعا ەلىمىزدىڭ جەتەكشى جوعارى وقۋ ورىندارىنىڭ 8 رەكتورلىق گرانتى تابىستالدى: 6 گرانت – SDU-دان، 2 گرانت – حالىقارالىق قوجا احمەت ياساۋي ۋنيۆەرسيتەتىنەن. سونداي-اق، ماتەماتيكا، فيزيكا جانە ينفورماتيكا پاندەرى بويىنشا I دارەجەلى ديپلوم يەگەرلەرى – 9-10 سىنىپ وقۋشىلارىنا الماتى قالاسىنداعى رەسپۋبليكالىق فيزيكا-ماتەماتيكا مەكتەبىندە 2025-2026 وقۋ جىلىندا ءبىلىم الۋعا گرانت بەرىلدى.
ايتا كەتەيىك، وليمپيادانىڭ قورىتىندى كەزەڭىنە قاتىسقان بارلىق وقۋشىلار «دارىن» رەسپۋبليكالىق سىرتتاي مەكتەبىنە قابىلدانادى. سونىمەن قاتار، I دارەجەلى ديپلوم يەگەرلەرى 2025 جىلعى ناۋرىز ايىندا وتەتىن جالپى ءبىلىم بەرەتىن پاندەر بويىنشا رەسپۋبليكالىق وليمپيادانىڭ سوڭعى كەزەڭىنە قاتىسادى.