قازاقستاننىڭ تانىمال ەسترادا ءانشىسى، تەلەجۇرگىزۋشى تامارا اسار الماتىدا وتكەن «حان سۇلتان. التىن وردا» وپەراسىنىڭ پرەمەراسىنان ەرەكشە اسەر العانىن جەتكىزدى.
– ەڭ الدىمەن، قويىلىمعا قاتىسقان بارلىق شىعارماشىلىق توپقا ۇلكەن قۇرمەت. مەنىڭشە، حان سۇلتان بەينەسى – جاۋىنگەر ءارى انا رەتىندە وتە جاقسى اشىلعان. قويىلىمنىڭ باسىنان سوڭىنا دەيىن كوز جاسىمدى تيا المادىم، ويتكەنى ءاربىرىمىزدىڭ بويىمىزدا انالىق مەيىرىم، جاۋىنگەرلىك رۋح جانە ايەلگە ءتان نازىكتىك بار. ءبىز وسى قاسيەتتەردىڭ بارلىعىن ءبىر ايەلدىڭ بويىنان كوردىك. سونىمەن قاتار، حان سۇلتان ەلگە، جۇبايىنا، بالالارىنا ادالدىقتىڭ كەرەمەت ۇلگىسىن كورسەتتى، – دەپ ءبولىستى تامارا اسار.
ءانشىنىڭ ايتۋىنشا، بۇل وپەرا قازاقستان ءۇشىن ۇلكەن ماڭىزعا يە.
– سوندىقتان ونى ءاربىر ازامات كورۋى كەرەك دەپ ويلايمىن. قويىلىمدى ساحنالاۋشىلارعا، يدەيا اۆتورلارىنا، جازۋشىلارعا، ارتىستەرگە، وپەرا انشىلەرى مەن مۋزىكانتتارعا شەكسىز العىس. بۇل جەردە تەك تاريح قانا ەمەس، ادالدىق، پسيحولوگيا جانە ادامگەرشىلىك تۋرالى تەرەڭ ماعىنا بار. سونىمەن قاتار، شىنايى ارنايى ەففەكتىلەر ەرەكشە اسەر قالدىردى، ءبارى سونشالىقتى نانىمدى ءارى ءتىرى كورىندى، كورەرمەندەر سول ءداۋىردىڭ وقيعالارىنا تولىقتاي ەندى، – دەدى ءانشى.