اۋىل مەكتەبى سۋعا كەتتى

اۋىل مەكتەبى سۋ استىندا قالعان. ءبىر قىنجىلتاتىنى، جەرگىلىكتى بيلىك بۇل جاعدايعا بايلانىستى شاراسىزدىق تانىتقان

باتىس قازاقستان وبلىسى، قاراتوبە اۋدانىنا قاراستى شالعىن دەگەن شاعىن عانا اۋىل بار. ونىڭ بارىن ءبىرى بىلسە، ءبىرى بىلە بەرمەس. 1988 جىلى بوي كوتەرگەن مەكتەپ سودان بەرى كۇردەلى جوندەۋ كورمەگەن، دەپ حابارلايدى Almaty-akshamy.kz sarapshy.info سايتىنا سىلتەمە جاساپ.

مەكتەپ اكىمشىلىگى وقۋشىلاردىڭ ءبىلىم الۋىنا بارىنشا جاعداي جاساپ، ءوز جىرتىقتارىن وزدەرى جاماپ كەلگەن. اۋىل بوپ جاڭا كورپۋستى دا وزدەرى جالعاپ سالىپ العان. اۋدان تاراپىنان ەشقانداي كومەك كورسەتىلمەگەن. 

قازىرگى جاعدايى وتە مۇشكىل. 2022 جىلدىڭ 28 ناۋرىزى كۇنى قىردان كەلگەن قىزىل سۋ مەكتەپتىڭ جالعانعان بولىگىن تۇگەلدەي دەرلىك جالماپ كەتتى. كىتاپتار مەن قۇجاتتار سۋعا كەتتى. ۇستازدار مەن اۋىل حالقى شاراسىز كۇيدە. اۋىلدىڭ جاناشىرلارىنىڭ ايتۋىنشا، قوسكول اۋىلدىق وكرۋگى اكىمى مەن اۋداندىق ءبىلىم ءبولىمىنىڭ باسشىسى قولدارىندا ءبىر كۇرەگى جوق، نە الىپ كەلگەن تەحنيكاسى جوق كەلىپ، قۇر سوزبەن جۇباتقانداي كەيىپ تانىتىپ كەتىپ قالدعان.

اۋىل ازاماتتارى ءوز تەحنيكالارىن جۇمىلدىپ، تراكتورمەن قۇم تاسىپ توسەپ، قىزمەتكەرلەر بىرەسە سۋ تاسىپ، بىرەسە كىتاپ مەن قۇجات تاسىعان. كەلگەن اتقامىنەرلەر «وسى مەكتەپتى جاپپاي وتىرعانىمىزعا راحمەت ايتىڭدار» دەگەندەي سوزبەن تۇيرەپ، قورقىتقانداي بولدى.

اۋىل تۇرعىندارى حالىقتىڭ وسى جەردە شوعىرلانىپ، ءتۇتىنىن تۇتەتىپ وتىرعانداعى سەبەبى – بالالارىنىڭ ءبىلىم الاتىن مەكتەبى عانا دەپ وتىر. مەكتەپ جويىلسا، اۋىل دا ۇدەرە كوشپەك.

بالا سانى از بولعاسىن، مەكتەپ ۇستازدارى مەن اتا-انالار پاتروناتتىق تاربيەگە بالا الۋدى جوسپارلار وتىر. قازىرگى تاڭدا قۇجاتتىق جۇمىستار جۇرگىزىلۋدە، الداعى وقۋ جىلىنا دەيىن ماسەلەنىڭ وڭ شەشىمى تابىلادى دەگەن سەنىمدە اۋىل جۇرتى.

شاعىن عانا مەكتەپتىڭ تاۋدان تالانتتى شاكىرتتەرى مەن ءبىلىمدى ۇستازدارى كوپكە ۇلگى. بيىلعى وقۋ جىلىنىڭ ىشىندە 17 وقۋشى ءتۇرلى اۋداندىق جارىستاردان جەڭىمپاز اتانىپ، وبلىستان جۇلدەمەن ورالدى. 

اۋىل تۇرعىندارى جاقسىلىقتان ءۇمىت ۇزبەيدى، ولاردىڭ جاڭادان مەكتەپ سالىنىپ، ۇستازدار مەن وقۋشىلارعا جايلى جاعداي جاسالسا دەگەن تىلەكتەرى عانا بار.