بۇل تۋرالى پرەمەر-مينيستر ءاليحان سمايىلوۆ «Amanat» اتىنان سايلانعان ءماسليحات دەپۋتاتتارىنىڭ رەسپۋبليكالىق فورۋمىندا ايتتى.
«اۋىل اماناتى» جوباسىنا جەتى جىلدا 1 ترلن تەڭگە بولىنەتىنىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«اگروونەركاسىپ كەشەنىندە 536 ملرد تەڭگەنى قۇرايتىن 300-گە جۋىق جوبا ىسكە اسىرىلۋدا. كوكتەمگى ەگىس جانە ەگىن جيناۋ جۇمىستارىنا جەڭىلدەتىلگەن كرەديت بەرۋ كولەمى بيىل 140 ملرد تەڭگەگە دەيىن ۇلعايتىلدى. اۋىل شارۋاشىلىعى تەحنيكاسىنا جەڭىلدىكپەن كرەديت بەرۋ 145 ملرد تەڭگەگە جەتتى. جەڭىلدەتىلگەن باعامەن ەگىس جۇمىستارىنا 419 مىڭ توننا ديزەل ءبولىندى. سونىمەن قاتار ەگىن جيناۋعا قوسىمشا 400 مىڭ توننا ارزانداتىلعان ديزەل وتىنى قاراستىرىلعان»، - دەدى ۇكىمەت باسشىسى.
سونداي-اق پرەمەر-مينيستر بيىل مەملەكەت مەنشىگىنە قوسىمشا 5 ملن گەكتار اۋىلشارۋاشىلىق جەرلەرى قايتارىلاتىنىن اتاپ ءوتتى.
«اۋىلدىق اۋماقتارداعى الەۋمەتتىك، ينجەنەرلىك جانە كولىك ينفراقۇرىلىمدارىن جاڭعىرتۋعا باسا نازار اۋدارىلىپ وتىر. اۋىل حالقىنىڭ تابىسىن ارتتىرۋ ءۇشىن «اۋىل اماناتى» جوباسى ىسكە اسىرىلۋدا. سونىڭ شەڭبەرىندە ميكروكرەديت بەرۋ جانە كووپەراسيانى كەڭەيتۋ كوزدەلىپ وتىر. بيىل 100 ملرد تەڭگە ءبولىندى. جوبا 7 جىل ىشىندە 1 ملن-نان استام اۋىل تۇرعىنىن قامتيدى. وعان جالپى 1 ترلن تەڭگە قاراستىرىلادى»، - دەدى ءاليحان سمايىلوۆ.