اۋتيزممەن اۋىراتىن بالالار ءۇشىن ولاردىڭ مىنەز-قۇلقىن رەتتەۋ جانە قورشاعان الەمگە بەيىمدەلۋ ءۇشىن سەنسورلىق سەزىمدەردى الۋ وتە ماڭىزدى. وسى ماقساتتاردا ماماندار اۋتيزممەن اۋىراتىن بالالاردىڭ مىنەز-قۇلقىن رەتتەۋگە جانە بەيىمدەلۋگە كومەكتەسەتىن سەنسورلىق ويىنداردىڭ ءادىسىن پايدالانادى.
ءوز كەزەگىندە وڭالتۋ جانە جاڭا تەحنولوگيالاردى ەنگىزۋ ءبولىمىنىڭ پەداگوگ-لوگوپەدى جانار ەستەمەسوۆا اۋتيزمگە شالدىققان بالالارمەن جۇمىس جاساۋدا بالامالى جانە قوسىمشا قارىم-قاتىناس قۇرالدارىن قولدانۋ قاجەت ەكەندىگىمەن ءبولىستى. بۇل دياگنوزى بار كەيبىر بالالار وزدەرىنىڭ قاجەتتىلىكتەرى مەن تىلەكتەرىن اۋىزشا ايتا المايدى، باسقالارىندا جاقىن ادامدارىمەن قارىم-قاتىناستا سويلەۋ كەزىندە قيىندىقتار بولادى.
«بالامالى جانە قوسىمشا قارىم-قاتىناس ادىستەرى - بۇل ءسوز بەن ونى تولىقتىراتىن قىزمەتتەردى قاجەت ەتپەي-اق، بالانىڭ وتباسىنداعى قارىم-قاتىناسىن جاقسارتۋعا ىقپال ەتەتىن قارىم-قاتىناس ادىستەرى. ونىڭ ۇستىنە ءبىز كۇندەلىكتى ومىردە وسىنداي قارىم-قاتىناس ادىستەرىن قولدانامىز. بۇل، مىسالى، جول بەلگىلەرى، كيىم جاپسىرمالارى، قوعامدىق دارەتحانالاردى كورسەتەتىن بەلگىلەر جانە ت.ب. بالامالى كوممۋنيكاسيا دەگەنىمىز - ادامنىڭ سويلەمەي جانە جازباي-اق، كەز كەلگەن اقپاراتتى بەرۋ نەمەسە قابىلداۋدىڭ بارلىق تاسىلدەرى. ال قوسىمشا كوممۋنيكاسيا دەگەنىمىز – اقپاراتتى زاتتاردىڭ، ىم-يشارانىڭ جانە گرافيكالىق بەلگىلەردىڭ كومەگىمەن جەتكىزۋ ءتاسىلى»، - دەپ اتاپ ءوتتى ج.ەستەمەسوۆا.
بۇل رەتتە بايلانىس قۇرالدارى تومەن تەحنولوگيالىق، ورتا تەحنولوگيالىق جانە جوعارى تەحنولوگيالىق بولىپ بولىنەدى.
مامانداردىڭ ايتۋىنشا، بالامالى جانە قوسىمشا كوممۋنيكاسيالاردى قولدانۋ سويلەۋ مەن ءتىلدىڭ دامۋىنا، سونىڭ ىشىندە ءسوزدى تۇسىنۋگە جانە انا ءتىلىن مەڭگەرۋگە ىقپال ەتەدى. ولار بۇل بايلانىس ادىستەرىن مۇمكىندىگىنشە ەرتەرەك ەنگىزۋگە كەڭەس بەرەدى.