الماتىلىق ەرىك ديۋسەمبايەۆ قولىنا تۇسكەن كەز كەلگەن زاتتان كوز سۇيسىنەر كەرەمەت بۇيىمدار جاسايدى. ول ءۇشىن اينالاداعى زاتتىڭ بارلىعى كادەگە جارارلىق. تەمىردەن ءتۇيىن ءتۇيىپ، اعاشتان ويۋ وياتىن شەبەر جىگىت ءوزى تۇراتىن ءۇيدىڭ اۋلاسىن دا گۇلمەن كومكەرىپ، جاسىل جەلەكپەن جايقالتىپ قويعان.
ول وتباسىنداعى تۇڭعىش بالا. ۇيلەنگەن سوڭ بولەك شىعىپ، 2014 جىلى بوستاندىق اۋدانىنا قاراستى رادوستوۆەس كوشەسىندەگى 4 قاباتتى تۇرعىن ءۇيدىڭ ءبىرىنشى قاباتىنان پاتەر العان. ايتۋىنشا، العاش كوشىپ كەلگەندە تەرەزەسىنىڭ تۇسى جاي عانا بوس جاتقان الاڭ بولعان ەكەن. مۇندايدا قولى شەبەر جىگىت قاراپ وتىرسىن با، جۇبايى ەكەۋى وزدەرىنە تيەسىلى الاقانداي جەردى تازالاپ كوزدىڭ جاۋىن الاتىنداي شاعىن ساياباققا اينالدىرىپتى. بۇگىندە راۋشان گۇلدەرى جايناپ، اينالاسى تاستاردان جاسالعان ءتۇرلى مۇسىندەرمەن كومكەرىلگەن الاڭقاي كەز كەلگەندى وزىنە قاراتپاي قويمايدى. اسىرەسە، كەشكى سالقىندا اۋلانىڭ جانىنان وتكەندەر توقتاپ، سۋرەتكە تۇسۋدەن جالىقپايدى ەكەن.
– ەس بىلگەلى قالام مەن قارىنداشقا اۋەس بولىپ، بويىم جەتكەن جەردىڭ بارلىعىن سىزا بەرەدى ەكەنمىن. مەكتەپتە وقىعاندا دا جەكە شەبەرحانا بەرىپ، سول جەردە مەكتەپتىڭ تاپسىرىسى بويىنشا زاتتار جاسايتىنمىن. ال جوعارى سىنىپقا بارعاندا ليسەيگە تالاپكەرلەردى تارتۋ ءۇشىن كوميسسيا كەلىپ، بىزگە سۋرەت سالدىراتىن. سوندا مەنىڭ سۋرەتتەرىم كوڭىلدەرىنەن شىقسا كەرەك، ت.جۇرگەنوۆ اتىنداعى ونەر اكادەمياسىنىڭ جانىنداعى ليسەيگە بىردەن قابىلداندىم. كەيىن كوللەدجىن وقىدىم، ودان كەيىن اكادەميانى، ماگيستراتۋرانى ءبىتىردىم. وسىلايشا دارىگەر بولىپ شىعاتىنداي 12 جىل ۋاقىتىمدى بەرىپ، وقۋىمدى اياقتادىم. ديپلومدىق جۇمىسىمدى قورعاۋعا تەاترعا كەلىپ، كەيىن «بىزدە سۋرەتشى بولىڭىز» دەگەن ۇسىنىس بولعان سوڭ، سول تەاتردا قويۋشى-باس سۋرەتشى بولىپ، ونەر جولىندا 15 جىلداي قىزمەت ەتتىم. سول كەزدە زامان تالابىنا ىلەسىپ، نارىق تالابىنا بەيىمدەلۋ ءۇشىن جەكە كاسىپ باستاعان بولاتىنمىن. ءبىراق ەكى جۇمىستى قاتار الىپ ءجۇرۋ قيىنداۋ بولعان سوڭ، جەكە كاسىبىمدى جالعاستىرامىن دەپ شەشتىم، – دەيدى ول ءوزى جايىندا سۇراعانىمىزدا.
ەرىك ديۋسەمبايەۆ – بيىل «الماتى ءبىزدىڭ ورتاق ءۇيىمىز» ناۋقانى اياسىندا وتكەن سايىستا بوستاندىق اۋدانى بويىنشا «ۇزدىك اۋلا» بايقاۋىنىڭ باس جۇلدەسىن يەلەنگەن جەڭىمپاز.
– بىردە جۇبايىم ەكەۋمىز اۋىلدان كەلە جاتىپ، جول بويىنداعى گۇلدەرگە قاتتى قىزىقتىق. ءسويتىپ اۋلامىزعا بىردەن 27 راۋشان وتىرعىزدىق. كەيىن تەرەكتەر اكەلىپ ەكتىك. اۋلامىز اسىرەسە، جازدا ادەمى! كەيدە تەرەزەدەن قاراپ سۇيسىنەتىنىم بار. ەڭبەكتەنگەن ادام عانا ارمانىنا جەتەدى دەپ جاتادى عوي. بۇل جۇلدە ءبىزدىڭ كوپ جىلعى ماڭداي تەرىمىزدىڭ جەمىسى دەپ بىلەمىن. بارلىعى ويلاماعان جەردەن بولدى. جاڭالىقتاردان ەستىپ، بايقاۋعا قۇجات تاپسىرعان سوڭ، قۇرامىندا دەپۋتاتتار مەن اۋدان اكىمدىگىنىڭ كورىكتەندىرۋ ءبولىمىنىڭ قىزمەتكەرلەرى بار 8 ادامنان تۇراتىن كوميسسيا مۇشەلەرى اۋلامىزدى كورۋگە كەلدى. كەيىن 6 كۇننەن كەيىن اكىمدىكتەن حابارلاستى. باردىق. ءۇشىنشى ورىننان جوعارى قاراي جۇلدەگەرلەر انىقتالىپ، سوڭىنان باس جۇلدە دەپ مەنىڭ ءاتى-جونىمدى اتاعاندا قاتتى قۋاندىم، – دەيدى جەڭىمپاز جىگىت.
ەرىكتىڭ جۇبايى سالتانات تا ونەر ادامى، ياعني ول دا قويۋشى-سۋرەتشى. ءقازىر مۇحامەد ەسىمدى كىشكەنتاي بوپەلەرىنىڭ كۇتىمىمەن دەكرەتتىك دەمالىستا وتىر.
«جىگىتكە جەتى ونەر دە از» دەگەن. ءبىز ەسىك الدىنداعى تامسانباۋعا بولمايتىن اسەمدىكتەن ەرىكتىڭ قولتاڭباسىن كوردىك. جوقتان بار جاساي الاتىن ازاماتتىڭ الاقانداي اۋلاسىندا ءبارى بار. شىعارماشىلىق ادامى بولعان سوڭ شىعار، سىلدىراپ اققان بۇلاق پەن سۋبۇرقاق تا، سايراپ تۇرعان قۇس تا، سىمداي تارتىلعان ارىق تا شاعىن ساياباقتىڭ ىشىندە ەرەكشە تالعاممەن ۇيلەسىپ تۇر. سامالاداي جارىق شامدارى قوسىلعاندا بۇل جەر ءتىپتى تاماشا ەكەن!
ەندەشە، كوپقاباتتى تۇرعىن ءۇي اۋلاسىن ءوز ەڭبەكتەرىمەن جاسىل-جەلەككە اينالدىرىپ، الماتىداي الىپ شاھاردىڭ كوگالدانۋىنا ۇلەس قوسىپ جۇرگەن بۇل جاس وتباسى كوپكە ۇلگى بولارلىقتاي-اق...
P.S. شەبەر جىگىتتىڭ «شەديەۆرلەرى» مۇنىمەن بىتپەك ەمەس. ەرىك سەرىك ۇلىنىڭ ارمانى دا، العا قويعان ماقساتى دا كوپ. قازىرگى تاڭدا ول بولاشاقتا بوي كوتەرەتىن كيىز ءۇي ۇلگىسىندەگى ءوزى تۇراتىن ءۇيدىڭ ماكەتىن جاساۋمەن اينالىسىپ جاتىر. ىسكە ءسات دەيمىز.
