الماتىدا اسكەري مىندەتتىلەردىڭ جيىندارى باستالدى

29219 اسكەري ءبولىمىنىڭ بازاسىندا تىلدىق قامتاماسىز ەتۋ ماماندارىنىڭ اسكەري جيىندارى ءوتىپ جاتىر.

ءىس-شارالار اسكەري مىندەتتىلەردىڭ پراكتيكالىق داعدىلارىن جەتىلدىرۋگە، اسكەري دايىندىقتىڭ تالاپ ەتىلەتىن دەڭگەيىن جانە ولاردى قولدانۋعا ازىرلىگىن قولداۋعا باعىتتالعان، دەپ حابارلايدى Almaty-akshamy.kz قورعانىس مينيسترلىگىنە سىلتەمە جاساپ.   

تىلدىق قامتاماسىز ەتۋ سالاسىندا ارناۋلى مامانداردى دايىنداۋ جۇرگىزىلۋدە. ولاردىڭ قاتارىندا اسپازشى، ناۋبايشى، وتىن جابدىقتارىن، كيىم-كەشەك زاتتارىن جوندەۋ شەبەرلەرى، كىر جۋۋ، كيىم شەبەرحانالارىنىڭ باستىقتارى، ۆەتەرينارلىق فەلدشەرلەر مەن زەرتحاناشىلار بار.

وقۋ ماتەريالدىق-تەحنيكالىق بازا ءبىلىم الۋشىلارعا تىلداعى قامتاماسىز ەتۋ مىندەتتەرىن ورىنداۋ ءۇشىن قاجەتتى ءبىلىم مەن داعدىلار قورىن بەرۋگە مۇمكىندىك بەرەدى. اسكەري مىندەتتىلەردىڭ تۇرمىسىن ۇيىمداستىرۋ ءۇشىن اسكەري شارۋاشىلىقتىڭ بارلىق ەلەمەنتتەرى ورنالاستىرىلعان، مادەني جانە سپورتتىق ءىس-شارالار قاراستىرىلعان.

– جيىنعا مەديسينالىق كوميسسيادان ءساتتى وتكەن 120-دان اسا ادام تارتىلعان. تاجىريبەلى نۇسقاۋشىلاردىڭ باسشىلىعىمەن اسكەري مىندەتتىلەر اسكەري شارۋاشىلىق جۇرگىزۋگە، تاماقتانۋدى ۇيىمداستىرۋعا، زاتتاي مۇلىكپەن قامتاماسىز ەتۋگە جانە ماتەريالدىق-تەحنيكالىق قامتاماسىز ەتۋدىڭ باسقا دا ماسەلەلەرىنە وقىتىلاتىن بولادى. وقۋ ارنايى ترەناجەرلاردى قولدانۋ ارقىلى وتەتىنىن ايتا كەتۋ كەرەك، – دەپ ءتۇسىندىردى جيىن باستىعى، 29219 اسكەري ءبولىمىنىڭ كومانديرى پولكوۆنيك ميرحات وعىزبايەۆ. 

ءتيىستى اسكەري-ەسەپتىك ماماندىق بويىنشا جيىنداردىڭ وقۋ باعدارلاماسىن يگەرۋ ەمتيحاندار مەن سىناقتاردى تاپسىرۋ جولىمەن تەكسەرىلەتىن بولادى. باعدارلامانى ءساتتى يگەرگەندەرگە كەزەكتى اسكەري اتاق بەرىلەدى.

جيىنعا شاقىرىلعان زاپاستاعى ەفرەيتور راشيت بەگەنباي ءوز جوسپارلارىن ورتاعا سالدى.

– ۋاقىتىسىندا مەرزىمدى قىزمەتىمدى وتەدىم. بولاشاقتا كەلىسىمشارت بويىنشا اسكەري قىزمەتكە كىرۋدى جوسپارلاپ وتىرمىن. سوندىقتان قازىرگى جيىندار مەن ءۇشىن ءوز داعدىلارىمدى جەتىلدىرۋ تۇرعىسىنان وتە پايدالى بولادى، –  دەدى ول.                                                                                   

جيىندار 9 شىلدەگە دەيىن جالعاسادى. وسى كەزەڭدە اسكەري مىندەتتىلەردىڭ جۇمىس ورنى مەن اتقاراتىن لاۋازىمى ساقتالادى. رەسپۋبليكالىق بيۋدجەت ەسەبىنەن ولارعا ورتاشا ايلىق جالاقى تولەنەدى.