اۋعانستاندا ايەلدەرگە ساياباقتاردا سەرۋەندەۋگە تىيىم سالىندى

اتالعان ەرەجەلەر بۇكىل ەلدە قولدانىلادى.

بيلىككە كەلگەن "تاليبان" قوزعالىسى ءتيىستى قاتاڭ جارلىق شىعاردى، دەپ حابارلايدى Almaty-akshamy.kz Inbusiness.kz cىلتەمە جاساپ. 

قاتاڭ شەكتەۋلەرگە بايلانىستى ايەلدەرگە بۇدان بىلاي كابۋلداعى ساياباقتارعا بارۋعا تىيىم سالىندى.

وسىعان دەيىن ايەلدەرگە ەل استاناسىندا ورنالاسقان باسسەيندەر مەن سپورت زالدارعا بارۋعا تىيىم سالىنعان بولاتىن. اتالعان ەرەجەلەر بۇكىل ەلدە قولدانىلادى دەپ كۇتىلىپ وتىرعان كورىنەدى.

تاليبان جاڭا شەكتەۋلەر ەنگىزگەن سايىن اۋعان ايەلدەرى مەن قىزدارىن بۇدان ءارى نە بولۋى مۇمكىن دەگەن ساۋال الاڭداتادى.

كەيبىرى بۇل شارالار ەلدىڭ كوپ بولىگىنە اسەر ەتپەيدى دەيدى.

"تاليبان كەلگەنگە دەيىن ورتا مەكتەپتى اياقتاعانىما قۋانامىن. ءبىراق ەندى ۋنيۆەرسيتەتتەردىڭ ەسىگى ايەلدەر ءۇشىن دە جابىق بولۋى مۇمكىن دەپ قورقامىن. ونداي بولعان كۇنى ارماندارىمنىڭ كۇل-تالقانى شىعادى"، - دەدى ستۋدەنت قىزداردىڭ ءبىرى.

بەلسەندى لەيلا باسيم ايەلدەرگە قاتىستى شەكتەۋلەر تۋرالى ءوز ويىن ءبىلدىردى.

"ءبىز ايىرىلىپ قالعان ەركىندىك تۋرالى ويلايتىن بولسام، كوڭىلىمە قاياۋ تۇسەدى. وزگە ەلدەر مارستى يگەرىپ جاتقاندا، ءبىز ءالى دە نەگىزگى قۇقىقتار ءۇشىن كۇرەسۋدەمىز"، - دەدى ول.

ايتا كەتۋ كەرەك، تاليبتەر اۋعانستاننىڭ بيلىگىن 2021 جىلدىڭ تامىز ايىندا باسىپ العان بولاتىن.