اۋعانستان وندىرگەن حالىقارالىق باسەكەگە قابىلەتتى الەمدەگى العاشقى وتاندىق سپورتتىق اۆتوكولىك Mada 9 دەپ اتالادى جانە ول كاتاردا كورمەگە قويىلادى.
Entop اۆتوموبيل ديزاينى كومپانياسىنىڭ قىزمەتكەرى جانە ينجەنەر-جاساۋشى مۋحامماد ريزا ءاحماديدىڭ ايتۋىنشا، Mada 9-دى اۋعانستاننىڭ اقپاراتتىق تەحنولوگيالار مينيسترلىگى مەن اۋعانستاننىڭ يننوۆاسيا ورتالىعىنىڭ قارجىلاي قولداۋىمەن جانە ىقپالىمەن بەس جىل بويى 30 ادامنان قۇرالعان توپ «ناۋۆاري» تەحنيكالىق جانە كاسىپتىك ءبىلىم ورتالىعىندا جاساپ شىعارعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇل كولىكتى جاساۋ ءۇشىن احمادي «Toyota Corolla» كولىگىنىڭ قوزعالتقىشىن پايدالانعان، ونى جارىستا قولدانار الدىندا جاڭارتۋ قاجەت.
احمادي ونىڭ ونەرتابىسى كاتارداعى Doha Expo 2023 كورمەسىندە تانىستىرىلادى دەپ ۇمىتتەنىپ وتىر.
ول كولىككە كوپتەگەن ۇسىنىستار العانىن، ءبىراق كولىك ساتىلمايتىنىن اتاپ ءوتتى. ونىڭ باعالاۋىنشا، ماشينا حالىقارالىق باسەكەگە قابىلەتتى.
«بۇل ماشينانىڭ ەرەكشەلىگى - اۋعانستاندا جاسالعان جانە الەمدە باسقا مۇنداي ماشينا جوق دەۋگە بولادى. اۋعانستان سوعىسپەن، قاقتىعىستارمەن جانە كەدەيلىكپەن تانىمال ەل بولدى، ءبىراق ەندى مۇندا وسىنداي دۇنيەلەر دە بار، - دەدى ول. – ەكىنشىدەن، ونىڭ ديزاينى بىرەگەي، ۇشىنشىدەن، اۆتوموبيل مىقتى جانە جەڭىل».
«اۆتوكولىكتى ساتىپ الۋعا دەگەن قىزىعۋشىلىق ۇلتتىق جانە حالىقارالىق دەڭگەيدە بارشىلىق، ءبىراق ءبىز الاتىن ۇسىنىستار ستاندارتتى ەمەس. ءبىز ونى حالىقارالىق نارىقتاعى باسەكە ءۇشىن شىعاردىق جانە ءتيىستى ۇسىنىستار بولادى دەپ ۇمىتتەنەمىز»، - دەدى احمادي.
اۋعانستاننىڭ كاسىپتىك-تەحنيكالىق ءبىلىم جانە يننوۆاسيالار ورتالىعىنىڭ ديرەكتورى ماۆلاۆي گۋلام حايدار شاحاماتتىڭ ايتۋىنشا، ءاۆتوموبيلدىڭ سۋرەتتەرى ينتەرنەتتە تاراعان.
ونىڭ اۋعانستاندا شىعارىلعانىن ەستىگەن الەم تاڭ-تاماشا بولعان كورىنەدى.
كولىك ءالى تولىق جاسالىپ بىتكەن جوق جانە ول ەلدىڭ بۇكىل پروۆينسيالارىندا تانىستىرىلادى دەپ بولجانىپ وتىر.
سپورتكار العاش رەت 2022 جىلدىڭ جەلتوقسانىندا العاشقى قار جاۋعاندا كورسەتىلدى.
الەۋمەتتىك جەلىلەردە سپورتتىق كولىككە «بۋگاتتيدىڭ ۇلتتىق بالاماسى» دەگەن اتاۋ بەرىلدى.