وتكەن جىلدىڭ قورىتىندىسى بويىنشا انا ءولىمى ءۇش ەسە تومەندەگەن.
بىلتىر 407 مىڭ جۇكتى ايەل باقىلاۋدا بولدى، 412 مىڭ بالا دۇنيەگە كەلگەن، دەپ حابارلايدى Almaty-akshamy.kz
بۇگىن دەنساۋلىق ساقتاۋ مينيسترلىگى القاسىنىڭ كەڭەيتىلگەن وتىرىسىندا پرەمەر-مينيستردىڭ ورىنباسارى التاي كولگىنوۆتىڭ قاتىسۋىمەن دەنساۋلىق ساقتاۋ ۆيسە-مينيسترى ۆياچەسلاۆ دۋدنيك مەملەكەت باسشىسىنىڭ انا مەن بالا دەنساۋلىعىن ساقتاۋ ماسەلەلەرى جونىندەگى تاپسىرمالارىن ىسكە اسىرۋ تۋرالى بايانداما جاسادى.
نەگىزگى كورسەتكىشتەردىڭ تومەندەۋىنە قاراماستان، كادر تاپشىلىعى، ماتەريالدىق-تەحنيكالىق جاراقتاندىرۋ، ينفراقۇرىلىمنىڭ توزۋى باستى پروبلەما كۇيىندە قالىپ وتىر. بۇل مەديسينالىق كومەك كورسەتۋ ساپاسىنا تىكەلەي اسەر ەتەدى.
ايەلدەر مەن بالالارعا بىلىكتى مەديسينالىق كومەك كورسەتۋ ءۇشىن ەلدە 5 مىڭنان اسا مساك وبەكتىسى، 240 پەرزەنتحانا، ونىڭ ىشىندە 39 پەريناتالدىق ورتالىق، 23 بالالار اۋرۋحاناسى جانە 4 رەسپۋبليكالىق كلينيكا جۇمىس ىستەيدى.
ۆيسە-مينيستردىڭ ايتۋىنشا، پەرزەنتحانا دەڭگەيىندە اكۋشەر-گينەكولوگتارمەن جۇمىس ىستەۋ 45%-دان 80%-عا دەيىن وزگەرەدى. وسى باعىتتاعى كادر تاپشىلىعىنا قاتىستى بۇگىندە ەلىمىزدە 275 اكۋشەر-گينەكولوگ، 323 انەستەزيولوگ-رەانيماتولوگ، 100 نەوناتولوگ جەتىسپەيدى. بالالار ستاسيونارلارىندا 200 پەدياتر، 340 انەستەزيولوگ-رەانيماتولوگ تاپشىلىعى بايقالادى.
سقو-دا نەوناتولوگتاردىڭ، اتىراۋ وبلىسىندا پەدياترلاردىڭ، تۇركىستان وبلىسىندا بالالار انەستەزيولوگ-رەانيماتولوگتارىنىڭ تاپشىلىعى ەرەكشە نازار اۋدارتادى.
كادرلىق قاجەتتىلىكتەردى قاناعاتتاندىرۋ ماقساتىندا مينيسترلىك 2022 جىلى «اكۋشەر جانە گينەكولوگيا» ماماندىعى بويىنشا رەزيدەنتۋرانىڭ 108 ءبىلىم بەرۋ گرانتىنا، «پەدياتريا»، «نەوناتولوگيا»، «بالالار حيرۋرگياسى»، «بالالار ونكوگەماتولوگياسى» ماماندىقتارى بويىنشا 292 گرانتقا مەملەكەتتىك تاپسىرىس ءبولدى. وڭىرلەرگە 290 جاس تۇلەك، ونىڭ ىشىندە 198 بالالار دارىگەرى، 92 اكۋشەر-گينەكولوگ ءبولىندى.
ۆياچەسلاۆ دۋدنيك بالالار ولىمىنە اسەر ەتەتىن فاكتورلاردىڭ قاتارىندا پاتروناتتىق باقىلاۋدىڭ تيىمدىلىگىن اتادى.
«ەل بويىنشا بالالاردى امبەباپ پاتروناجدىق پاكەتپەن قامتۋ 86%-دى قۇرايدى. ولاردىڭ تەك 17%-ى پروگرەسسيۆتى باقىلاۋعا جاتادى. بۇل جۇرگىزىلەتىن پاتروناجدار ساپاسىنىڭ تومەندىگىن كورسەتەدى. حالىقارالىق تالاپتارعا سايكەس پروگرەسسيۆتى پاكەتتەگى بالالار سانى كەمىندە 30%-دى قۇراۋى ءتيىس»، - دەپ اتاپ ءوتتى ۆيسە-مينيستر.
وسىلايشا، دەنە سالماعى وتە تومەن بالالاردىڭ ءومىر ءسۇرۋ دەڭگەيى 4 ەسە ءوستى. ال نارەستە ءولىمى 1،7 ەسە، بالالار ءولىمى 1،6 ەسە تومەندەدى. نەوناتالدىق حيرۋرگيانىڭ جانە وسى تەحنولوگيالاردىڭ وڭىرلەرگە ترانسفەرتىنىڭ دامۋىمەن ءتۋابىتتى اقاۋلارى بار جاڭا تۋعان نارەستەلەردىڭ ءومىر ءسۇرۋ دەڭگەيى 86%-دى قۇرادى.
ينفراقۇرىلىمنىڭ توزۋىن جانە پەرزەنتحانالار مەن بالالار ستاسيونارلارىنىڭ تەحنيكالىق جابدىقتالۋىنىڭ جەتكىلىكسىزدىگىن ەسكەرە وتىرىپ، 2023 جىلى مەملەكەت باسشىسىنىڭ تاپسىرماسى بويىنشا حالىقارالىق ستاندارتتار بويىنشا 11 پەريناتالدىق ورتالىق سالۋ ماسەلەسى پىسىقتالىپ جاتىر.