اۋەجاي قىزمەتكەرلەرى بارلىق جولاۋشىلاردى ءجىتى تەكسەرۋى مىندەت. ال ادام بىلمەستىكتەن ءبىر ەرەجەنى بۇزىپ قويسا، تەكسەرىس ۇزاققا سوزىلۋى ىقتيمال. كەيدە بۇل جۇيكەگە ارتىق سالماق بولىپ تۇسەدى، - دەپ حابارلايدى Almaty-akshamy.kz Tengritravel.kz-كە سىلتەمە جاساپ.
جاقسى دەمالىستان كەيىن ادامدار ۇيىنە تەك بازارلىق قانا ەمەس، ءدامدى بىردەڭە دە الىپ قايتقىسى كەلەدى، ماسەلەن حوش ءيىستى ىرىمشىك. الايدا ىرىمشىك پەن ەت سياقتى ورگانيكالىق ونىمدەر قىزمەتكەرلەر قاراپ وتىراتىن ەكراندا سارى تۇسپەن كورسەتىلەدى دە، ارتىق سۇراقتار تۋدىرادى.
جۇكتى ەرتەرەك ولشەپ الىڭىز
جۇكتى ۇيدە نەمەسە اۋەجايدىڭ تىركەلۋ اۋماعىندا ورنالاسقان تارازىدا ولشەپ الىڭىز. جۇگىڭىز ارتىق بولىپ كەتىپ جاتسا، سومكەلەردىڭ ىشىندەگىنى تەڭ ەتىپ بولۋگە نەمەسە كەرەگى جوق زاتتى تاستاۋعا بولادى. ايتپەگەندە ارتىق اقشا تولەۋگە تۋرا كەلەدى.
ءوز كەلبەتىڭىزگە ءمان بەرىڭىز
اياق كيىمدە باۋ، بيىك وكشە بولماعانى ابزال، كەرەك جاعدايدا جىلدام شەشە الۋ ءۇشىن. ۇستىڭىزگە دە قاراپايىمداۋ كيىم كيگەن ءجون: قالتاسى ازداۋ جانە تەمىر-تەرسەكسىز. ويتكەنى مەتالل تەكسەرىس كەزىندە قاتتى دىبىس شىعارادى. ساعات پەن شاشقا ارنالعان تەمىر بۇيىمداردى الدىن الا شەشىپ قويعان دۇرىس.
ۇساق زاتتاردى قالتا نەمەسە كىشكەنە سومكەگە جيناپ قويىڭىز
كىلت پەن تەلەفوندى قالتا نەمەسە يىققا اسا سالاتىن كىشكەنە سومكەگە سالىڭىز. ولاردى تەكسەرىس كەزىندە جىلدام الىپ شىعىپ، كورسەتىپ، تەكسەرىستەن وتكەننەن كەيىن جىلدام قايتىپ الاسىز. وسىلايشا، ۇساق-تۇيەكتى جوعالتىپ جۇرمەيسىز.