بۇگىن، 7 ءساۋىر كۇنى، الماتىدا اۋەجاي قىزمەتكەرىن كەپىلگە العان ەر ادامعا قاتىستى وتىرىسى باستالدى.
الماتى قالاسىنىڭ تۇركسىب اۋداندىق سوتىندا 67 جاستاعى الماتىلىق ماشراپبەك باراتوۆقا قاتىستى سوت پروسەسى باستالدى، دەپ حابارلايدى aqshamnews.kz.
ەستەرىڭىزدە بولسا، كۇدىكتى 7 ناۋرىز كۇنى الماتى اۋەجايىندا قىزمەتكەردى كەپىلگە الىپ، پىشاقپەن قورقىتقان ەدى. بۇدان بولەك ول ريۋكزاگىندا بومبا بارىن ايتقان.
سوتتالۋشى تاعىلعان ايىپپەن كەلىسىپ، كىناسىن تولىق مويىندادى.
بۇل جايتقا بايلانىستى ءۇش قىلمىستىق ءىس قوزعالدى.
كەپىلگە الۋ (ق ر قك-نىڭ 261-بابى 2-بولىگى 4-تارماعى) - مۇلكى تاركىلەنىپ، 7 جىلدان 12 جىلعا دەيىنگى مەرزىمگە باس بوستاندىعىنان ايىرۋ جازاسى.
قارۋ قولدانۋ ارقىلى جاسالعان بۇزاقىلىق (ق ر قك-نىڭ 293-بابى 3-بولىگى) - 3 جىلدان 7 جىلعا دەيىنگى مەرزىمگە باس بوستاندىعىنان ايىرۋ جازاسى.
تەرروريزم اكتىسى تۋرالى كورىنەۋ جالعان حابارلاۋ (ق ر قك-نىڭ 273-بابى) - 5 000 اەك مولشەرىندە ايىپپۇل نەمەسە 5 جىلعا دەيىن باس بوستاندىعىنان ايىرۋ جازاسى.