Pew Research كومپانياسى جۇرگىزگەن زەرتتەۋ ناتيجەسىنە قاراعاندا، امەريكا قۇراما شتاتتارى مەن كەنيا تۇرعىندارى وزگە ەلدەرگە قاراعاندا يسلامدى ەڭ كوپ قابىلدايتىن بولىپ شىقتى.
بۇل جايىندا islam.kz پورتالى ءوز كەزەگىندە Morocco World News رەسۋرسىنا ءجون سىلتەگەن IslamNews اقپارات اگەنتتىگىنە سىلتەمە جاساي وتىرىپ ءمالىم ەتەدى، دەپ حابارلايدى aqshamnews.kz.
الەۋمەتتانۋشىلار انىقتاعانداي، ءاربىر بەسىنشى امەريكالىق تۇرعىن وزگە نانىم-سەنىمدەگى وتباسىندا ءوسىپ، يسلامعا ءوز بەتىنشە كەلگەن. دەسە دە اقش حالقىنىڭ اراسىندا مۇسىلماندار قاراسى وزگە ەلدەرمەن سالىستىرعاندا وتە از – بار-جوعى شامامەن 1%-دى قۇرايدى. ال كەنياعا كەلسەك، افريكا قۇرلىعىنداعى اتالعان ەل تۇرعىندارىنىڭ 11%ى مۇسىلمانداردان تۇرادى.
اقش پەن كەنيا تۇرعىندارىنىڭ يسلامدى قابىلداعاندار اراسىندا بۇرىن حريستيان سەنىمىندەگىلەردىڭ ۇلەسى جوعارى. ءبىر نارسە انىق، يسلام تاربيەسىندە وسكەندەر اراسىندا وزگە نانىم-سەنىمگە وتكەندەر قاراسى وتە از. ءتىپتى، يسلامنان باس تارتقاندارىنىڭ ءوزى وزگە نانىم-سەنىمگە كەتپەيدى، ولار اگنوستيككە نەمەسە اتەيستكە اينالادى.