«ەل سامعاۋ» قورى ۇشقىشتاردى «قازاقستان اۆياسياسىنا 100 جىل» مەدالىمەن ماراپاتتادى
ۇشاقتى اپاتتان امان الىپ قالعان قازاقستاندىق ۇشقىشتاردى ازاماتتىق اۆياسيانىڭ ارداگەرلەر وداعى ارنايى سىيلىقپەن ماراپاتتادى. ماراپاتتاۋ ءراسىمى «Air Astana» اۆياكومپانياسىنىڭ عيماراتىندا ءوتتى.
ەكيپاج مۇشەلەرى – كاپيتان ۆياچەسلاۆ اۋشيەۆ، ەكىنشى ۇشقىشتار باۋىرجان قاراشولاقوۆ پەن سەرگەي سوكولوۆ 2018 جىلى اۋەدە ءقاۋىپتى جاعدايعا تاپ بولادى. ءبىراق ۇشقىشتار از ۋاقىت ىشىندە باسقارۋ جۇيەسىن قالپىنا كەلتىرىپ، ۇشاقتى ءساتتى قوندىردى. Air Astana ۇشقىشتارى بىلتىر وسى ەرلىگى ءۇشىن حيۋ گوردون-بەرگە سىيلىعىن يەلەنگەن ەدى.
2018 جىلدىڭ 11 قاراشاسىندا ۇشقىشتارىمىز ليسسابوندا (پورتۋگاليا) بوگدە ۇيىم كورسەتكەن تەحنيكالىق قىزمەتتەن كەيىن Embraer E190 ۇشاعىمەن بازاعا قايتارۋ رەيسىن ورىنداعان. سول ساتتە ەلەرونداردى باسقارۋ كابەل جۇيەسىنىڭ دۇرىس ورناتىلماۋىنا بايلانىستى، ۇشقاننان كەيىن ۇشاق باسقارىلماي قالادى. دەگەنمەن، ۇشقىشتار ماسەلەنى انىقتاپ، باقىلاۋدى ءىشىنارا قالپىنا كەلتىرىپ، ۇشاقتى پورتۋگاليانىڭ وڭتۇستىك-شىعىسىنداعى بەجا اۋە كۇشتەرىنىڭ بازاسىنا ءقاۋىپسىز قوندىرا الدى.
«Air Astana-دا 2008 جىلدان بەرى جۇمىس ىستەيمىن. ال ۇشقىش رەتىندە قىزمەتىمدى 2014 جىلدىڭ اياعىندا باستادىم. اۋەدە 4800-دەي ساعات ۇشتىم. ارينە، سول كۇنگى رەيس وڭاي بولعان جوق. باستى ماقساتىمىز – ۇشاقتى امان-ەسەن جەرگە قوندىرۋ بولدى. اۆياسياعا كەلەردە كەز كەلگەن جاعدايعا دايىن بولۋدى ۇيرەتەدى. جىلىنا 2 رەت ەمتيحان تاپسىرىپ، ءبىلىم جەتىلدىرەمىز»، –دەيدى Air Astana اۋەكومپانياسىندا ەكىنشى ۇشقىش باۋىرجان قاراشولاقوۆ.
جيىندا قازاقستان اۆياسياسى سالاسى ارداگەرلەرىنىڭ «ەل سامعاۋ» قوعامدىق قورىنىڭ مۇشەلەرى اۆياكومپانيا باسشىسى پيتەر فوستەرگە ۇسىنىس-تىلەكتەرىن ايتتى.
«بۇل قور اۆياسيا ارداگەرلەرىنە كومەكتەسۋ ماقساتىندا 2012 جىل قۇرىلدى. شىنى كەرەك، 2000 جىلعا دەيىن زەينەتكە شىققان اۆياسيا سالاسىنداعى ارداگەرلەردىڭ زەينەتاقىسى وتە از. 90 مىڭ، ءتىپتى، ودان دا از الاتىن زەينەتكەرلەر بار. كوبىنىڭ الەۋمەتتىك جاعدايى تومەن. قوردىڭ قۇرامىندا تەك ۇشقىشتار عانا ەمەس، ينجەنەر-تەحنيكتەر، ديسپەچەرلەر مەن بورتسەرىكتەر دە بار»، – دەدى «ەل سامعاۋ» قوعامدىق قورىنىڭ ءتوراعاسى دميتريي ابباس ۇلى.