اۋانىڭ لاستانۋ پروبلەماسى شەشىلمەك

تازا اۋا ۇزاق ءومىر كەپىلىندەي

الداعى 5 جىل ىشىندە قازاقستاندا اۋانىڭ جوعارى لاستانۋى بار 10 قالادا ەكولوگيالىق ماسەلەلەر بىرتىندەپ شەشىمىن تابادى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ

بۇل تۋرالى «جاسىل قازاقستان» ۇلتتىق جوباسىن تانىستىرۋ بارىسىندا ق ر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ حابارلادى. ونىڭ ايتۋىنشا، ۇلتتىق جوبانىڭ ءبىرىنشى باعىتى «تازا قازاقستاننىڭ» ماقساتى - اتموسفەرالىق اۋانىڭ لاستانۋىن ازايتۋ.

«لاستانۋدىڭ جوعارى دەڭگەيى ونەركاسىپتىك كاسىپورىنداردىڭ قىزمەتىمەن جانە ەلەكتر ستانسيالارىندا كومىردى جاعۋمەن بايلانىستى ەكەنى جاسىرىن ەمەس. وسى پروبلەمانى شەشۋ ءۇشىن اۋانىڭ جوعارى لاستانۋى بار 10 قالادا 5 جىل ىشىندە 16 ءىرى ونەركاسىپ كاسىپورىندارىنداعى شىعارىندىلاردى 20% قىسقارتۋ بولجانىپ وتىر. مىسالى، «ارسەلورميتتال تەمىرتاۋ» شىعارىندىلاردى 54% ازايتۋ بويىنشا مىندەتتەمەلەر الدى»، - دەدى ق ر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ.

سونداي-اق، «جاسىل قازاقستان» ۇلتتىق جوباسى جالپى 11 مىندەتتەن، ولار بويىنشا 19 كورسەتكىش جانە 48 ءىس-شارادان تۇرادى.