اتىراۋدا ءوزىن "حاكەر" دەپ تانىستىرىپ، الەۋمەتتىك جەلىدە جوعالعان وتباسىعا قاتىستى ءتۇرلى نۇسقالار تاراتقان ەر ادام ينتەرپول ارقىلى حالىقارالىق ىزدەۋگە جاريالاندى، دەپ حابارلايدى Aqshamnews.kz ءتىلشىسى.
اتىراۋ وبلىستىق پوليسيا دەپارتامەنتى اتالعان ازاماتتىڭ حالىقارالىق دەڭگەيدە ىزدەۋدە جۇرگەنىن رەسمي راستاعان. قۇقىق قورعاۋ ورگاندارى ونىڭ الاياقتىق بويىنشا ايىپتالىپ وتىرعانىن، الدىن الا دەرەك بويىنشا شەتەلدە بوي تاسالاپ جۇرگەنىن حابارلاعان.
پوليسيا نە دەيدى؟
پوليسيا بۇعان دەيىن "حاكەردىڭ" الەۋمەتتىك جەلىدە جاريالاعان "ءوز زەرتتەۋىنە" قاتىستى پىكىر ءبىلدىرىپ، ونىڭ قارجىلىق اعىمدار مەن باسقا دا دەرەكتەر تۋرالى ايتقاندارى شىنايىلىققا سايكەس كەلمەيتىنىن مالىمدەگەن. سونىمەن قاتار ۆەدومستۆو رەسمي دەرەككوزدەرگە عانا سۇيەنۋدى سۇراپ، جالعان اقپارات تاراتقانى ءۇشىن زاڭ بويىنشا جاۋاپكەرشىلىك قاراستىرىلعانىن ەسكەرتكەن.
پوليسيانىڭ اقپاراتىنشا، اتالعان ادامعا قاتىستى بۇعان دەيىن الاياقتىق فاكتىلەرى بويىنشا ءتورت قىلمىستىق ءىس تىركەلگەن، تەرگەۋ جالعاسىپ جاتىر.
اتىراۋداعى جاعدايدىڭ جاي-جاپسارى
ەسكە سالساق، 6 قاڭتاردا اتىراۋ وبلىسىنىڭ جانگەلدين اۋىلىنان 66 جاستاعى ماقسوت قارابالين مەن 64 جاستاعى جۇبايى ناسيپ ۇتەشقالييەۆانىڭ ءمايىتى تابىلعان. ءىس بويىنشا باستى كۇدىكتى رەتىندە مارقۇمداردىڭ 29 جاستاعى كۇيەۋ بالاسى سۇلتان سارسەمالييەۆ اتالادى. ول دا حالىقارالىق ىزدەۋدە. ال مارقۇمداردىڭ كەنجە قىزى اقبايان مۇقانعالييەۆا حابار-وشارسىز كەتكەندەر رەتىندە حالىقارالىق ىزدەۋگە جاريالانعانى ايتىلدى.