الماتى قالاسىنىڭ اكىمى دارحان ساتىبالدى جۇمىس ساپارى اياسىندا جەتىسۋ اۋدانىنداعى ءبىرقاتار نىساندى ارالاپ، قوعامدىق كەڭىستىكتەردىڭ جاي-كۇيىنە جانە اۋماقتىڭ وندىرىستىك الەۋەتىنىڭ دامۋىنا نازار اۋداردى.
جۇمىس ساپارى بارىسىندا الماتى اكىمى جانگەلدين اتىنداعى سكۆەرگە بارىپ، اعىمداعى جوندەۋ مەن كورىكتەندىرۋ جوسپارىمەن تانىستى. جوبا اياسىندا اۋماقتى كوگالداندىرۋ، گۇلزارلار مەن شاعىن ساۋلەتتىك نىساندار ورناتۋ، اۆتوماتتى سۋارۋ جۇيەسى مەن سىرتقى جارىقتاندىرۋدى ىسكە قوسۋ، سونداي-اق جۇرگىنشىلەر جولدارى مەن دەمالىس ايماقتارىن ۇيىمداستىرۋ كوزدەلگەن. سكۆەردىڭ جالپى اۋماعى – 3،6 گەكتار. جوبانى ىسكە اسىرۋ 2026 جىلعا جوسپارلانعان.
سكۆەر اۋماعىندا بەلسەندى جانە وتباسىلىق دەمالىس ءۇشىن ەكى بالالار ويىن الاڭى، ۆوركوۋت الاڭى، فۋتبول جانە باسكەتبول الاڭدارى، ءۇش شاحمات ۇستەلى مەن ءۇش ۇستەل تەننيسى ۇستەلىن ورناتۋ جوسپارلانعان. سونىمەن قاتار، جوباعا سايكەس 95 ورىندىق پەن 95 قوقىس جاشىگى قويىلىپ، اۆتوتۇراق ايماعى ۇيىمداستىرىلادى.
سونداي-اق، قالا اكىمى 2005 جىلدان بەرى جۇمىس ىستەپ كەلە جاتقان «كامەرتون» جشس-نە باردى. كاسىپورىن شيكىزاتتى وڭدەۋدەن باستاپ دايىن ءونىمدى قاپتاۋعا دەيىنگى تولىق وندىرىستىك جۇمىس ءتارتىبىن جۇزەگە اسىرادى. وندىرىستىك قۋاتتىلىعى ايىنا 4 230 تونناعا دەيىن ءونىم شىعارۋعا مۇمكىندىك بەرەدى. بۇل وڭدەۋ ونەركاسىبىن دامىتۋعا جانە نارىقتى ساپالى ءسۇت ونىمدەرىمەن قامتاماسىز ەتۋگە ەلەۋلى ۇلەس قوسادى. كاسىپورىندا 300-دەن استام ادام ەڭبەك ەتەدى.
سونىمەن قاتار، دارحان ساتىبالدى STYNERGY كاسىپورنىنا بارىپ، ءوندىرىس قۋاتىمەن، ءونىم اسسورتيمەنتىمەن جانە ەكسپورتتىق الەۋەتىمەن تانىستى. كومپانيا قۇرىلىس جانە مەتالل قۇرىلىمدارى ماتەريالدارىن وندىرۋگە ماماندانعان. ونىمدەرىن تاجىكستان مەن قىرعىز رەسپۋبليكاسىن قوسا العاندا، تمد ەلدەرىنە ەكسپورتتايدى. سونداي-اق، قازاقستاننىڭ ءبىرقاتار قالاسىندا فيليالدارى بار، بۇل كاسىپورىننىڭ كەڭ گەوگرافيالىق قامتىلۋىن قامتاماسىز ەتەدى.
كاسىپورىن ونىمدەرىنىڭ اسسورتيمەنتىنە مەتالل شاتىر مەن شاتىردىڭ قوسالقى ەلەمەنتتەرى، ءتۇرلى ۇلگىدەگى پروفناستيل، سەندۆيچ-پانەلدەر، قاسبەتتىك جۇيەلەر، سۋ اعىزۋ جانە جەلدەتۋ جۇيەلەرى، گيپسوكارتون مونتاجىنا ارنالعان ارماتۋرالىق پروفيلدەر، لينەارلى پانەلدەر، سونداي-اق مەتالل جيھازدار كىرەدى. وندىرىستە شامامەن 250 قىزمەتكەر جۇمىس ىستەيدى.
كاسىپورىنداردى ارالاۋ بارىسىندا اۋداننىڭ ونەركاسىپتىك الەۋەتىن دامىتۋ، جاڭا جۇمىس ورىندارىن قۇرۋ، ءوندىرىستى كەڭەيتۋگە جاعداي جاساۋ جانە بيزنەستىڭ قالالىق قۇرىلىمدارمەن ءوزارا ءىس-قيمىلى ماسەلەلەرى تالقىلاندى.
جۇمىس ساپارىنىڭ قورىتىندىسى بويىنشا دارحان ساتىبالدى قالانىڭ اۋداندارىن كەشەندى دامىتۋ، ياعني قوعامدىق كەڭىستىكتەردى كورىكتەندىرۋدى ەكونوميكانىڭ ناقتى سەكتورىن قولداۋمەن ۇشتاستىرۋدىڭ ماڭىزىن اتاپ ءوتتى. سونداي-اق، سالالىق باسقارمالار مەن اۋدان اكىمدىگىنە جوبالاردى جان-جاقتى قولداۋدى جانە قويىلعان مىندەتتەردىڭ ورىندالۋىن باقىلاۋدى تاپسىردى.