اتىراۋ وبلىسىنىڭ ەسبول اۋىلىندا مەكتەپ قۇرىلىسى بەس جىلعا سوزىلىپ بارادى. كەلىسىمشارت بويىنشا ءبىلىم وشاعى 2022 جىلى پايدالانۋعا بەرىلۋگە ءتيىس ەدى. الايدا مەردىگەردىڭ جاۋاپسىزدىعىنان قۇرىلىس توقتاپ قالعان، - دەپ حابارلايدى aqshamnews.kz ءتىلشىسى 24.kz-كە سىلتەمە جاساپ.
ەسبول اۋىلىنىڭ تۇرعىندارى بۇل مەكتەپ قۇرىلىسىنىڭ اياقتالۋىن بەس جىل بويى كۇتىپ ءجۇر. العاش قولعا العان مەردىگەر جۇمىستى جارتىلاي جاساپ تاستاپ كەتكەن. بيىل قۇرىلىس باسقارماسىنىڭ ارالاسۋىمەن جۇمىس قايتا جانداندى. جاڭا مەردىگەر نىساندى ءۇشىنشى وقۋ توقسانىنا تاپسىرامىز دەپ وتىر.
"ءقازىر جۇمىس 80 پايىزعا ءبىتىپ تۇر. قالعان سىرتقى قاسبەت جۇمىستارىن جاساپ جاتىرمىز جانە بارديۋر، سىرتقى ويىن الاڭدارىن سالىپ جاتىرمىز. ىشتە دە ءالى جۇمىستار ءجۇرىپ جاتىر. كافەل جاپسىرۋ جۇمىستارى بار"، - دەدى قۇرىلىس ۋچاسكەسىنىڭ باستىعى نۇرجان حاليدۋللين.
اۋىلداعى ءۇش مەكتەپتە 800-دەي وقۋشى ءبىلىم الادى. ونىڭ بىرەۋى 2020 جىلى اپاتتى دەپ تانىلعان. الايدا بالالار سول ەسكى عيماراتتا ساباق وقىپ ءجۇر. سوندىقتان جاڭا 300 ورىندىق مەكتەپ اۋىل ءۇشىن ايرىقشا ماڭىزعا يە.
"بۇل مەكتەپ زاماناۋي قۇرىلىس تالاپتارىنا ساي سالىنىپ جاتىر. مۇندا ۇلكەن سىنىپ بولمەلەرى، وقۋ زەرتحانالىق بولمەلەر، سپورت زالدار، اسحانا زامان تالاپتارىنا ساي سالىنىپ جاتىر. وسى مەكتەبىمىز بىتسە، اۋىل حالقىنا جانە وقۋشىلارعا ۇلكەن جاعداي جاسالادى"، - دەدى ەسبول اۋىلدىق وكرۋگى اكىمىنىڭ ورىنباسارى ەربولات ءسابىروۆ.
سونىمەن قاتار مەردىگەرلەردىڭ جاۋاپسىزدىعىنان يندەر كەنتىندەگى مەكتەپتىڭ قۇرىلىسى سوزىلىپ بارادى. كەلىسىمشارت تالاپتارىن ورىنداماعاندار ءىسى سوتقا جولدانعان.
"سوت شەشىمىنە سايكەس مەردىگەرمەن كەلىسىمشارتتى تولىقتاي بۇزعان بولاتىنبىز. سونىمەن قاتار، ءارى قاراي جۇمىستاردى جالعاستىرۋ ءۇشىن ونىڭ جوبالارىن مىندەتتى تۇردە قايتا ەسەپتەۋ كەرەك بولدى. سول سەبەپتەرگە بايلانىستى مەكتەپتىڭ جالپى كونسەپسياسىن، سىرتقى كەلبەتىن جانە دە ىشكى جابدىقتارىن تولىقتاي وزگەرتىپ، جوبانى قايتا جاسادىق"، - دەدى قۇرىلىس، ساۋلەت جانە قالا قۇرىلىسى باسقارماسىنىڭ باسشىسى نۇربەرگەن قۇسايىنوۆ.
اتىراۋ وبلىسى ءۇشىن مەكتەپ ماسەلەسى ءالى دە وزەكتى. ءقازىر بالالار بەس ءبىلىم وشاعىندا ءۇش اۋىسىمدا وقيدى. وسىعان وراي، 19 مەكتەپتىڭ قۇرىلىسى باستالعان. التاۋىنىڭ قۇرىلىسى كەستەدەن كەشىگىپ جاتىر. جەرگىلىكتى بيلىك وكىلدەرى مەردىگەر مەكەمەلەرگە تالاپتى كۇشەيتتى. جىل اياعىنا دەيىن ءتورت مەكتەپ قولدانىسقا بەرىلۋگە ءتيىس.