نەگىزگى ماقسات - مەملەكەتتىك قىزمەتتەردى اۆتوماتتاندىرۋ
بيىلدان باستاپ سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى جەر قويناۋىن پايدالانۋشىلار ءۇشىن ەتالوندىق گەواقپاراتتىق جۇيە قۇرۋعا باعىتتالعان Kaznedra جوباسىن ۇسىندى، دەپ حابارلايدى Almaty-akshamy.kz Inform.kz-كە سىلتەمە جاساپ.
بۇل جۇيە جەكە جانە زاڭدى تۇلعالارعا جەر قاتىناستارى مەن جەر قويناۋىن پايدالانۋ سالاسىنداعى اقپاراتقا قولجەتىمدىلىك بەرەتىن بولادى. ونىڭ تاعى ءبىر فۋنكسياسى - وسى سالالاردا كورسەتىلەتىن مەملەكەتتىك قىزمەتتەردى اۆتوماتتاندىرۋ. بۇل جوبانى سيفرلىق دامۋ ءمينيسترى باعدات مۋسين مەن ەكولوگيا ءمينيسترى سەرىكقالي برەكەشيەۆ جان-جاقتى تالقىلادى.
قازىرگى ۋاقىتتا مينيسترلىك جوبانى ىسكە اسىرۋ بويىنشا جول كارتاسىن ازىرلەپ، بەكىتتى، جەر قويناۋىن پايدالانۋشىلاردىڭ بيزنەس-پروسەستەرىن اۆتوماتتاندىرۋ بويىنشا ءبىرىڭعاي تاسىلدەردى ايقىندادى. جوبا بىردەن بىرنەشە ۆەدومستۆونىڭ، سونىڭ ىشىندە ەكولوگيا، گەولوگيا جانە تابيعي رەسۋرستار، قورعانىس، اۋىل شارۋاشىلىعى، يندۋستريا جانە ينفراقۇرىلىمدىق دامۋ مينيسترلىكتەرىنىڭ، سونداي-اق جەرگىلىكتى اتقارۋشى ورگانداردىڭ دەرەكتەر بازاسىن قوسۋدى كوزدەيدى. مۇندا ەرەكشە قورعالاتىن تابيعي اۋماقتار، جەر استى سۋلارى، گيدروتەحنيكالىق، ينجەنەرلىك قۇرىلىستار جانە ت.ب. بويىنشا دەرەكتەر ساقتالاتىن بولادى.
بۇل رەتتە، ءسدياوم جوبانىڭ تەحنيكالىق بولىگىن ورىنداۋدى، ونىڭ ىشىندە قاجەتتى اقپاراتتى جۇكتەۋ ءۇشىن دەرەكتەر بازاسىنىڭ قۇرىلىمىن قۇرۋدى دا ءوز موينىنا الادى، ال سيفرلاندىرۋ جانە اقپاراتپەن تولتىرۋ، سونداي-اق قۇقىقتىق الاڭدى قالىپتاستىرۋ سالالىق مەملەكەتتىك ورگانداردا قالادى.
«Kaz-Nedra پلاتفورماسى اشىقتىقتى قامتاماسىز ەتەدى جانە راسىمدەردى سيفرلاندىرۋ ارقىلى جەر قويناۋىن پايدالانۋ قۇقىعىن بەرۋگە باقىلاۋدى كۇشەيتۋگە مۇمكىندىك بەرەدى. مۇندا جەر قويناۋى ۋچاسكەلەرىن ىزدەستىرۋدەن، گەولوگيالىق اقپارات پەن ليسەنزيالار الۋدان باستاپ، جەر قويناۋىن پايدالانۋشىلاردىڭ ەسەپتىلىگىن، ونىڭ ىشىندە سالىق تولەمدەرىن قالىپتاستىرۋ مەن تاپسىرۋعا دەيىن ءبىرقاتار راسىمدەردى جۇزەگە اسىرۋعا بولادى»، - دەپ اتاپ ءوتتى ۆەدومستۆو باسشىسى باعدات مۋسين.
ونىڭ ايتۋىنشا، پلاتفورمانى ەنگىزۋ جەر قويناۋىن پايدالانۋشىلار ءۇشىن ءبىرىڭعاي تەرەزەدە بارلىق راسىمدەر مەن قىزمەتتەردى شوعىرلاندىرۋ ارقىلى ينۆەستورلارعا كەشەندى سەرۆيستىك قولداۋ كورسەتۋگە ىقپال ەتەدى