اتىراۋ مۇناي وڭدەۋ زاۋىتىنداعى جوندەۋ جۇمىستارى قاشان اياقتالاتىنى بەلگىلى بولدى

ماماندار بۇل جۇمىستىڭ 45 كۇنگە سوزىلاتىنىن ايتىپ وتىر.

اتىراۋ مۇناي وڭدەۋ زاۋىتىندا تەحنولوگيالىق قوندىرعىلاردى جوندەۋ جۇرگىزىلىپ جاتىر، دەپ حابارلايدى Almaty-akshamy.kz.

«اتىراۋ مۇناي وڭدەۋ زاۋىتى» ج ش س باسپا ءسوز قىزمەتىنىڭ مالىمەتىنشە، 1 قازاننان بەرى العاش رەت تەحنولوگيالىق قۇرىلعىلاردى كەزەكپەن جوندەۋ جۇمىستارى ءجۇرىپ جاتىر.

«قوندىرعىلاردى كەزەكپەن جوندەۋ مۇناي ونىمدەرىن شىعارۋدى توقتاتپاۋعا مۇمكىندىك بەرەدى. جوندەۋدىڭ مۇنداي ءتاسىلى قازاقستانداعى مۇناي وڭدەۋ زاۋىتتارىندا بۇرىن-سوڭدى قولدانىلماعان. بۇل – اتىراۋ مۇناي وڭدەۋ زاۋىتىنىڭ تاريحىنداعى ەڭ كۇردەلى جوندەۋ. زاۋىتتا بۇعان دەيىن مۇنداي كولەمدەگى جوندەۋ جۇمىستارى بولعان ەمەس. جوندەۋ ۇزاققا سوزىلادى. قۇرىلعىلاردىڭ كەيبىرى 20 كۇنگە جۋىق مەرزىمدە جوندەلەدى. ال، كاتاليتيكالىق كرەكينگ پروسەسى جۇرەتىن ەڭ كۇردەلى قوندىرعى 45 كۇنگە جۋىق ۋاقىت جوندەۋدە بولادى. ءبىز تىزبەكتى جوندەۋ ءتاسىلىن قولدانۋدامىز»، -دەپ حابارلادى «قازمۇنايگاز» ۇق» اق مۇناي وڭدەۋ جانە مۇنايحيميا دەپارتامەنتىنىڭ ديرەكتورى دميتريي ماكەيەۆ.

ونىڭ ايتۋىنشا، مۇنايدى باستاپقى وڭدەۋگە ارنالعان ەكى قوندىرعى بار. تەحنولوگيالىق قوندىرعىلاردىڭ ءبىر تىزبەگى جوندەۋ توقتاتىلعاندا، ەكىنشى تىزبەگى جۇمىس ىستەيدى. سول سەبەپتەن، زاۋىتتىڭ جۇمىسى تولىق توقتاتىلمايدى. جوندەۋ كەزىندە زاۋىت 50-70%-عا تەڭ قۋاتپەن ءونىم شىعارۋدى جانە جونەلتۋدى جالعاستىرا بەرەدى.

«الداعى ۋاقىتتا زاۋىت جوندەۋدى كەزەڭ-كەزەڭىمەن، ءبىر جىلدا ءبىر تىزبەكتى جوندەۋدەن وتكىزۋدى جوسپارلاپ وتىر. جوندەۋدىڭ مۇنداي جۇيەسى مۇناي وڭدەۋ كولەمىن ۇلعايتىپ، ونىمدەر سانىن ارتتىرۋعا مۇمكىندىك بەرەدى. وسىلايشا ءاموز ىشكى جانار-جاعارماي نارىعىنا اسەرىن ازايتىپ، جوندەۋ جۇمىستارى كەزىندە الەۋمەتتىك ماڭىزى بار مۇناي ونىمدەرىن شىعارۋدى قامتاماسىز ەتپەك»، -دەپ ءمالىم ەتتى دميتريي ماكەيەۆ.