سيفرلاندىرۋ مەكتەپكە دەيىنگى ءبىلىمدى دە قامتيدى.
وقۋ-اعارتۋ ءمينيسترى اسحات ايماعامبەتوۆ ءبىلىم سالاسىنداعى قانداي قىزمەتتەر سيفرلاندىرىلاتىنىن ايتتى، دەپ حابارلايدى Almaty-akshamy.kz
ءمينيستردىڭ ايتۋىنشا، ءار ءمۇعالىمنىڭ سيفرلىق پورتفوليوسى پايدا بولادى. سايكەسىنشە، پەداگوگتىڭ اتتەستاسياسى، جۇمىسقا قابىلداۋ ءراسىمى، كونكۋرستارعا قاتىسۋى، جەتىستىكتەرى جانە بارلىق اقپاراتى سول جۇيەگە جۇكتەلىپ، ەلەكتروندى فورماتتا وتەدى.
«مەكتەپتەردە وقۋلىقتاردى تاڭداۋ مەن مونيتورينگتەۋ سيفرلىق فورماتقا كوشىرىلەدى. اتتەستاتتار مەن ديپلومدار QR-كودپەن سيفرلىق فورماتتا بەرىلەدى. ءار وقۋشىنىڭ دا سيفرلىق ءپروفيلى ەڭگىزىلەدى، وندا وقۋشىنىڭ بالاباقشادان باستاپ مەكتەپ، الدە كوللەدج بىتىرگەنگە دەيىنگى اكادەميالىق، الەۋمەتتىك جەتىستىكتەرى، باعالارى، قۇزىرەتتەر كارتاسى، ءبىر سوزبەن ايتقاندا، سيفلىق ءىزى قالىپتاستىرىلادى»، - دەدى ايماعامبەتوۆ ۇكىمەت وتىرىسىندا.
سيفرلاندىرۋ مەكتەپكە دەيىنگى ءبىلىمدى دە قامتيدى. مينيستر بۇگىنگى تاڭدا بالاباقشالارعا كەزەك سيفرلىق فورماتقا كوشىرىلگەنىن اتاپ ءوتتى. دەسەك تە، ءالى دە ۇلكەن ماسەلە بار.
«كەزەككە قويۋ بويىنشا وبلىستاردا 44 اقپاراتتىق جۇيە پايدالانىلادى، بىرىزدىلىك جوق، تاۋەكەلدەر بار. وسى ماسەلەنى شەشۋ ماقساتىندا ورتالىقتاندىرىلعان بالاباقشالارعا ءبىرىڭعاي كەزەك ەنگىزىلەدى. بۇل بالاباقشاعا كەزەككە تۇرۋدى، بەرىلگەن جولدامانى باقىلاۋعا، ورىنداردى ءبولۋ كەزىندە تاۋەكەلدەردى بولدىرماۋعا مۇمكىندىك بەرەدى»، - دەدى ۆەدومستۆو باسشىسى.
ايماعامبەتوۆ ەڭ قاجەتتى قىزمەتتەر تولىعىمەن eGov پەن ءىرى بانكتەردىڭ ءموبيلدى قوسىمشالارىندا قولجەتىمدى بولاتىنىن ايتتى.