«الماتى جاستارى» جەڭىلدەتىلگەن نەسيە بەرۋ باعدارلاماسى اياسىندا وتىنىمدەردى قوسىمشا ىرىكتەۋ قورىتىندىلارى تۋرالى
الماتى قالاسى اكىمدىگى 2022 جىلعى 10-14 قازان ارالىعىندا www.almaty-zhastary.kz سايتى ارقىلى «الماتى جاستارى» قالالىق جەڭىلدىكپەن نەسيەلەندىرۋ باعدارلاماسىنا قاتىسۋ ءۇشىن وتىنىمدەردى قوسىمشا ىرىكتەۋدى جۇزەگە اسىردى، - دەپ حابارلايدى almaty-akshamy.kz
باعدارلاماعا اعىمداعى جىلدىڭ نەگىزگى كونكۋرستىق ىرىكتەۋ كەزەڭىندە (2022 جىلعى 18 مامىردان 1 ماۋسىمعا دەيىن) ءوتىنىم بەرگەن، ءبىراق قۇجاتتاردىڭ دۇرىس تولتىرىلماۋىنا/راسىمدەلمەۋىنە/بەرىلمەۋىنە بايلانىستى وتپەگەن ءوتىنىش بەرۋشىلەر عانا قاتىستى.
وتىنىشتەر مەن قۇجاتتاردى قابىلداۋ قورىتىندىسى بويىنشا 2135 قاتىسۋشى ءوز وتىنىمدەرىن رەداكسيالادى جانە قۇجاتتارىن جاڭارتتى.
بارلىق كەلىپ تۇسكەن وتىنىشتەر مەن قۇجاتتاردىڭ باعدارلاما تالاپتارىنا سايكەستىگى تەكسەرىلدى جانە ءار سالا بويىنشا ەڭ كوپ جيناعان باللدار سانى بويىنشا ءتىزىم قالىپتاستىرىلدى.
ىرىكتەلگەن قاتىسۋشىلاردىڭ ءتىزىمى، رەزەرۆكە ەنگىزىلگەن جانە قابىلدانباعان قاتىسۋشىلاردىڭ تىزىمدەرى وتىنىمدەردى قابىلداۋ www.almaty-zhastary.kz سايتىندا ورنالاستىرىلعان.
ىرىكتەلگەن 183 ۇمىتكەرلەرگە سايتتاعى جەكە كابينەتكە «وتباسى بانك» اق تولەم قابىلەتتىلىگىن راستاۋ ءۇشىن جولداما بەرىلدى.
ەسكە سالساق، وسى باعدارلاما اياسىندا كەمىندە 1000 نەسيە بەرۋ جوسپارلانعان. بۇگىندە باعدارلاما بويىنشا 829 قاتىسۋشى باسپانالى بولدى، تاعى 27 قاتىسۋشى باسپانا ىزدەۋدە.
الماتى قالاسى كوممۋنالدىق ينفراقۇرىلىمدى دامىتۋ باسقارماسى