17–19 قازان ارالىعىندا الماتى وبلىسىندا ورنالاسقان «Almaty Horse & Polo Club» بازاسىندا اتپەن مانەرلەپ جۇرۋدەن قازاقستان رەسپۋبليكاسىنىڭ چەمپيوناتى ءوتتى. ءۇش كۇنگە سوزىلعان ءارتۇرلى جاس ەرەكشەلىكتەرىنە وراي بىرنەشە سانات بويىنشا ۇيىمداستىرىلدى.
چەمپيونات باعدارلاماسىنا حالىقارالىق ات سپورتى فەدەراسياسىنىڭ (FEI) سىناقتارى ەنگىزىلدى. ەلىمىزدىڭ ەڭ ۇزدىك شاباندوزدارى ات ۇستىندەگى شەبەرلىگىن سپورتسۇيەر قاۋىمعا پاش ەتىپ، اسەمدىك پەن ءتارتىپتىڭ ۇيلەسىمىن كورسەتتى.
ات سپورتىنىڭ بۇل ءتۇرى – شاباندوز بەن ات اراسىنداعى بايلانىس سىنالاتىن ەرەكشە سپورت ءتۇرى. مۇندا اتپەن جۇرگەن كەزدەگى تەپە-تەڭدىك، قوزعالىس دالدىگى جانە تىزگىندى مەڭگەرۋ شەبەرلىگى باعالانادى. سوندىقتان بۇل سپورت ءتۇرى كوبىنە «ات ۇستىندەگى بالەت» دەپ اتالادى.
قازاقستان ات سپورتى فەدەراسياسىنىڭ باس حاتشىسى ازات تولقىمبەكوۆتىڭ ايتۋىنشا، ەلىمىزدە كەيىنگى جىلدارى ات سپورتىنا، سونىڭ ىشىندە مانەرلەپ جۇرۋگە قىزىعۋشىلىق ارتىپ كەلەدى.
“ەلىمىزدە اتپەن مانەرلەپ ءجۇرۋ سپورتىنىڭ تەرەڭ ءارى باي تاريحى بار. ماسەلەن، اتى اڭىزعا اينالعان ابسەنت تۇلپارى سەرگەي فيلاتوۆتىڭ باسقارۋىمەن وليمپيادا چەمپيونى اتانعان بولاتىن. بۇل – ءبىزدىڭ ماقتانىشىمىز. ءالى دە جەتەتىن جەتىستىكتەر كوپ”، - دەيدى ول.
ەجەلگى گرەكيادا اسكەري دايىندىق رەتىندە پايدا بولعان سپورت ءتۇرى بۇگىنگى تاڭدا وليمپيادا ويىندارى مەن الەم چەمپيوناتتارىنىڭ رەسمي باعدارلاماسىنا ەنگەن. جارىستاردى ۇيىمداستىرۋ جانە باعالاۋ FEI – حالىقارالىق ات سپورتى فەدەراسياسىنىڭ ەرەجەلەرى نەگىزىندە جۇرگىزىلەدى.
مەن ءۇشىن ەڭ قيىنى – جىلقىنى باسقارۋ بولدى، – دەيدى الماتىلىق شاباندوز ۆەنەرا التييەۆا، – دەگەنمەن، بۇل سىناقتى ابىرويمەن ەڭسەرە الدىم. بۇل جارىسقا ۇزاق ۋاقىت بويى تىڭعىلىقتى دايىندالدىق. جاتتىعۋلار بارىسىندا ءوزارا تۇسىنىستىككە، ۇيلەسىمدىلىككە كوپ كوڭىل بولدىك. پرينس ەسىمدى فريز تۇقىمدى تۇلپارىممەن ەل چەمپيوناتىنا العاش رەت قاتىستىم. جارىستىڭ بارلىق تالابىن دۇرىس ورىنداۋعا كۇش سالدىق”، - دەيدى ۆەنەرا التييەۆا.
قازاقستانداعى ات سپورتىنىڭ دامۋى ەلدىڭ حالىقارالىق دەڭگەيدەگى بەدەلىن ارتتىرۋعا جانە سالاۋاتتى ءومىر سالتىن ناسيحاتتاۋعا باعىتتالعان ماڭىزدى قادام بولىپ وتىر. وسىنداي چەمپيوناتتار – جاس شاباندوزدارعا تاجىريبە الماسۋعا جانە سپورتتىق جەتىستىكتەرگە جەتۋگە مۇمكىندىك بەرەتىن ماڭىزدى الاڭ.