نۇرعالي الىمبايەۆ، ۇلكەن اۋىلىنىڭ تۇرعىنى:
مەنىڭ ويىمشا، اتوم ەلەكتر ستانسياسى ءبىزدىڭ ايماققا وتە قاجەت. حالىق بىرنەشە جىلدان بەرى "سالىنادى" دەپ كۇتىپ ءجۇر، ءبىراق ناقتى قادامدار جاسالمادى. اۋىل تۇرعىندارى اەس-تىڭ پايداسىن كوپتەن بەرى سەزىنۋدى كۇتىپ ءجۇر، اسىرەسە جۇمىسسىزدىق ماسەلەسى شەشىلسە، كوپتەگەن جاستارعا مۇمكىندىك اشىلادى.
اەس قۇرىلىسى ارقىلى تەك جۇمىس ورىندارى عانا ەمەس، سونىمەن قاتار اۋىلدىڭ ينفراقۇرىلىمى دا داميدى دەپ سەنەمىز. جولدار جوندەلىپ، قىزمەت كورسەتۋ سالالارى كەڭەيىپ، حالىقتىڭ ءومىر ءسۇرۋ دەڭگەيى ارتا تۇسەدى. اۋىلىمىزداعى كاسىپكەرلەر مەن شارۋالارعا دا ۇلكەن سەرپىلىس بەرەدى دەپ ويلايمىن.
ەلەكتر ەنەرگياسىنىڭ تاپشىلىعى جىلدان جىلعا ارتىپ كەلەدى، جانە بۇل تەك ءبىزدىڭ ايماققا عانا ەمەس، بۇكىل ەلگە ۇلكەن پروبلەما بولىپ تۇر. اەس سالۋ ەلىمىزدىڭ ەنەرگەتيكالىق تاۋەلسىزدىگىن نىعايتۋعا، سىرتتان كەلەتىن ەنەرگياعا تاۋەلدىلىكتى ازايتۋعا مۇمكىندىك بەرەدى. ونىڭ ۇستىنە، اتوم ەنەرگياسى – بولاشاقتىڭ ەنەرگياسى. ودان قورقۋدىڭ قاجەتى جوق، كەرىسىنشە، زاماناۋي تەحنولوگيالاردىڭ ارقاسىندا قاۋىپسىزدىك جوعارى دەڭگەيدە قامتاماسىز ەتىلەدى.
ۇلكەن اۋىلىنىڭ تۇرعىندارى بالقاش كولىنىڭ جاعالاۋىنان اەس سالۋ تۋرالى باستامانى قىزۋ قولداپ وتىر. بۇل ءبىزدىڭ ايماق ءۇشىن ۇلكەن مۇمكىندىك دەپ بىلەمىز.